Prezidentning o‘g‘liga qizil kartochka ko‘rsatgan hakam jazolandi

Argentina futbol assotsiatsiyasi (AFA) hakami Nikolas Lamolina tashkilot prezidentining o‘g‘liga qizil kartochka ko‘rsatgani uchun diskvalifikatsiya qilindi. Bu haqda “The Sun” nashri xabar berdi.

Joriy yilning 28 oktyabr kuni Argentina chempionati 12-turidan o‘rin olgan “Barrakas Sentral” va “Boka Xuniors” o‘rtasidagi keskin kechgan uchrashuvda bosh hakam Nikolas Lamolina tomonidan qabul qilingan qarorlar katta bahs-munozaralarga sabab bo‘ldi. Bosh hakam uchrashuvning 14-daqiqasida “Barrakas” futbolchisi Ivan Tapiaga (AFA prezidenti Chiki Tapianing o‘g‘li ) ikkinchi sariq kartochkani ko‘rsatib, maydondan chetlatgan.

26 yoshli yarim himoyachi Paredesga nisbatan qo‘pollik ishlatgani uchun maydondan chetlatilgan, biroq uchrashuvdagi boshqa bahsli epizodlar, xususan, “Barrakas” futbolchilari Rafael Barrios va Xaver Ruisning qo‘pol o‘yinlari uchun jazolanmagani futbol jamoatchiligi e’tiroziga sabab bo‘lgan. VAR tizimi bu vaziyatlarni tekshirgan bo‘lsa-da, hakam qarorlari o‘zgartirilmagan. Yakunda “Boka Xuniors” jamoasi uchrashuvni 3:1 hisobida g‘alaba bilan yakunlagan.

Oradan ikki kun o‘tib, 42 yoshli Lamolina kelasi tur uchrashuvlari uchun hech qanday o‘yinga tayinlanmagani e’lon qilingan. AFA rasmiylariga ko‘ra, bu hakamning o‘yindagi xatolari bilan bog‘liq bo‘lgan, biroq tashkilot tomonidan boshqa jazo choralari ochiqlanmagan.

Bu voqea Argentina futbolida hakamlik mustaqilligi va adolatliligi masalasini yana kun tartibiga chiqargan. Mahalliy sharhlovchilar bu holatni “futboldagi kuch va ta’sir o‘rtasidagi murakkab muvozanatni” aks ettiruvchi hodisa deb baholamoqda.