Sirdaryoda 3 egizak dunyoga keldi

Sirdaryo viloyatida 3 nafar egizak chaqaloq tug‘ildi. Bu haqda viloyat Sog‘liqni saqlash boshqarmasi xabar berdi.

Qayd etilishicha, Boyovut tumani, "Bunyodkor" mahallasida yashovchi 2001 yilda tug‘ilgan onaning 3 nafar farzandi murakkab operatsiya o‘tkazish orqali tug‘dirib olingan.

"Respublika ixtisoslashtirilgan ona va bola salomatligi ilmiy-amaliy tibbiyot markazi Sirdaryo filialida 1-toifali akusher-ginekolog Shahlo Xo‘jayeva boshchiligida o‘tkazilgan murakkab operatsiya muvaffaqiyatli yakunlandi", deyiladi xabarda.

Dunyoga kelgan chaqaloqlar 2 o‘g‘il, 1 qiz bo‘lib, ularning vazni quyidagicha:

 1- o‘g‘il bola - 1 kg 920 gr
 2- o‘g‘il bola - 2 kg 710 gr
 3-qiz bola - 2 kg 830 gr

Bildirilishicha, ona va chaqaloqlarning ahvoli yaxshi, ular hozirda shifokorlar nazoratida.

Eslatib o‘tamiz, o‘tgan yilning avgust oyida Toshkent viloyatining Toshkent tumanida 23 yoshli ayol 4 nafar egizakni dunyoga keltirgandi. Respublika perinatal markazida chaqaloqlarning sog‘lom tug‘ilishi uchun barcha zarur shart-sharoit hozirlanib, kesarcha usulida, asoratsiz tug‘uruq amaliyoti natijasida 1622 grammlik bir nafar o‘g‘il, 1330, 1510 va 1370 grammlik uch nafar qiz tug‘ilgan.

Dilbar Shoakromova