Sobiq vazirning qizi kosmosga chiqqan ilk markaziy osiyolik ayolga aylanadi

Qozog‘istonlik Danna Karagusova Markaziy Osiyodan koinotga sayohat qilgan birinchi ayolga aylanadi. U Amazon asoschisi va milliarder Jeff Bezos tomonidan ishlab chiqilgan Blue Origin kompaniyasining New Shepard raketasida uchadi. Qozog‘iston OAVlari Karagusovaning Instagram’dagi sahifasiga tayanib xabar berishicha, parvoz 2025 yilning oktyabr oyida amalga oshiriladi.

Bo‘lajak parvoz atigi 10-12 daqiqa davom etadi. Raketa koinot boshlanadigan 100 kilometr balandlikka ko‘tariladi. Dannaga yana besh yo‘lovchi qo‘shiladi: biznesmen Jeff Elgin, muhandis Klint Kelli III, serial startap asoschisi Aaron Nyuman, ukrainalik tadbirkor Vitaliy Ostrovskiy va ismi sir qolishni istagan yana bir yo‘lovchi. Hamma vaznsizlikni boshdan kechiradi va kosmosdan Yerni ko‘radi. Parvoz jonli efirda namoyish etiladi.

Kompaniya chipta narxini oshkor qilmayapti. Ma’lumki, o‘rinni bron qilish uchun depozit 150 ming dollarni tashkil etadi, parvozning o‘zi esa 500 ming dollardan 1 million dollargacha bo‘lishi mumkin.

Karagusova kim?

43 yoshli Danna Karagusova olmaotalik taniqli tadbirkor ayol. U Qozog‘istonda marketing va innovatsion texnologiyalar sohasidagi yetakchi shaxslardan biri sanaladi.

Karagusova First Media Group marketing xolding kompaniyasi asoschisi sifatida keng e’tirofga sazovor bo‘ldi. 2018 yilning dekabrigacha u kompaniyaning yagona asoschisi va direktori edi, biroq keyinchalik direktor o‘zgardi.

Blue Origin bayonotiga ko‘ra, Danna Karagusova media va tadbirlarni boshqarish sohasida 25 yildan ortiq tajribaga ega. U san’at va ilm-fanni birlashtirgan raqamli o‘zini o‘zi boshqarish vositalarini ishlab chiquvchi kompaniyaga asos solgan. Tajribali alpinist Karagusova Kilimanjaro va Elbrus cho‘qqilarini zabt etgan va koinotni insoniyat uchun yangi evolyutsion chegara sifatida ko‘radi.

So‘nggi yillarda Danna Blue Origin tomonidan “biznes uchun multimodal ekotizim” sifatida tavsiflangan yangi Portals loyihasiga e’tibor qaratdi. Loyiha real vaqtda turli shaharlar ko‘chalarini bog‘laydigan jonli video tasmalari bilan interaktiv o‘rnatishlarni yaratadi.

Danna taniqli oiladan. Uning onasi Guljana Karagusova taniqli siyosatchi, sobiq mehnat va aholini ijtimoiy muhofaza qilish vaziri, Qozog‘iston Senati a’zosi. Uning katta akasi Farhod Karagusov Qimmatli qog‘ozlar markaziy depozitariysi direktorlar kengashida ishlaydi, Sky Bridge Capital investitsiya kompaniyasida yuridik masalalar bo‘yicha boshqaruvchi direktor va boshqaruv raisi o‘rinbosari, Kaspiy universiteti Xususiy huquq institutida bosh ilmiy xodim hisoblanadi.

Yana bir ukasi Roman Romanov 2016 yildan buyon Pavlodar viloyati kengashi deputati, 2018-2022 yillarda esa “Qozog‘iston alyuminiyi” aksiyadorlik jamiyatini boshqargan.

Danna Instagram’da faol, shaxsiy va professional hayotidan videolarni joylab boradi. U avvalroq bloger Beybit Alibekovga turmushga chiqqan, hozir u bilan ajrashgan. Sobiq er-xotinning uch farzandi bor.