“Tolibon” bolalar uchun qo‘g‘irchoq sotishni taqiqladi

Afg‘oniston janubidagi eng yirik shahar Qandahor hukumati qo‘g‘irchoqlar sotishni taqiqladi. Bu haqda “Afghanistan International” xabar berdi.

“Tolibon”ning ezgulikni targ‘ib qilish va illatlarning oldini olish vazirligi bir qator o‘yinchoqlar, jumladan, qo‘g‘irchoqlar sotilishini harom deb e’lon qildi.

“Taqiqlanishga toliblarning qo‘g‘irchoqlar butlarga o‘xshab ketadi, degan e’tiqodi sabab bo‘lgan bo‘lishi mumkin, ularga sig‘inish islomda gunoh hisoblanadi”, deyiladi xabarda.

Shahar hokimiyati taqiqlangan mahsulotlarni sotuv rastalaridan zudlik bilan olib tashlashni buyurgan.

Qandahor “Tolibon” oliy rahbari Haybatulloh Oxundzodaning qarorgohi hisoblanadi. Yaqin vaqtgacha shahar aholi soni bo‘yicha mamlakatda ikkinchi o‘rinda edi. Hozirda u islom qonunlarini talqin qilishda oqilona yondashish bilan ajralib turadigan islomning Hanafiy mazhabiga amal qiladigan katta pushtun ozchiligiga ega.

Iyun oyi boshida Afg‘onistonning Lag‘mon viloyati rasmiylari ommaviy axborot vositalarida odamlar, hayvonlar va boshqa tirik mavjudotlar tasvirini ko‘rsatishni taqiqlagan edi. Qoidalar Afg‘onistonning yana 18 viloyatida joriy qilingan – mamlakatda jami 34 ta viloyat mavjud.

So‘nggi to‘rt yil ichida “Tolibon” mamlakatda ko‘ngilochar va sport tadbirlariga qo‘yilgan cheklovlarni sezilarli darajada oshirdi. Masalan, “Tolibon” sport departamenti Afg‘oniston shaxmat federatsiyasi faoliyatini to‘xtatib, o‘yinni “taqiqlangan” deb e’lon qildi.

Eslatib o‘tamiz, avvalroq Afg‘onistondagi “Tolibon” muvaqqat hukumati kiyim-kechak kiyish qoidalarini buzgan ayol va qizlarni hibsga olishni boshlagandi.