Tong oldi qonli hujum: Janubiy Sudanda 169 kishi bir kunda halok bo‘ldi

Kecha, 1 mart kuni Janubiy Sudanning shimolida tong otmasdan boshlangan hujum mamlakatni yana fuqarolik urushi yoqasiga olib keldi. Rasmiy ma’lumotlarga ko‘ra, kamida 169 kishi halok bo‘lgan – ularning 90 nafari bolalar, ayollar va qariyalar. Qurbonlar orasida 79 nafar hududiy xavfsizlik kuchlari xodimlari, shu jumladan politsiyachilar ham bor. Bu haqda “BBC” xabar berdi.

Hukumatga qarashli Ruveng ma’muriy hududi axborot vaziri Jeyms Monyuluak Mijok hujumni “o‘nlab qurollangan yoshlar” amalga oshirganini bildirgan. Ularning qo‘shni Yuniti shtati hududidan kelgani va “Sudan People's Liberation Army in Opposition” bilan bog‘liq ekani aytilgan. Biroq muxolifat kuchlari bu ayblovni rad etib, zo‘ravonlikni siyosiylashtirishda rasmiylarni ayblagan.

Tong oldi hujum va ommaviy dafn

Hujum Abiyemnom tumanida mahalliy vaqt bilan soat 04:30 atrofida, odamlar hali uyquda bo‘lgan paytda boshlangan. Rasmiylarga ko‘ra, hukumat kuchlari soni jihatdan ustun bo‘lgan hujumchilarga dosh bera olmagan. Uch-to‘rt soat davom etgan to‘qnashuvlar chog‘ida uylar va bozorlar yoqib yuborilgan. Tuman komissari va ijroiya direktori ham halok bo‘lgan.

Yaralangan 50 kishining ko‘pchiligi qo‘shni Abiyey ma’muriy hududiga olib o‘tilgan. Qurbonlar soni yuqori va xavfsizlik xavotirlari saqlanib qolayotgani sababli, mahalliy manbalar ular ommaviy qabrga qo‘yilganini xabar qilmoqda.

Mintaqa yana alangalanadimi?

Janubiy Sudandagi BMT insonparvar kuchlari ma’lum qilishicha, kamida ming nafar tinch aholi missiya bazasi yaqinidan panoh izlagan. Tashkilot so‘nggi 48 soatda zo‘ravonlik keskin kuchayganidan xavotir bildirgan va barcha tomonlarni darhol o‘t ochishni to‘xtatib, muloqotga chaqirgan.

Vaziyat mamlakatning boshqa hududlarda ham tarang. Jongley shtatida to‘qnashuvlar kuchaygani ortidan “Chegara bilmas shifokorlar” 26 nafar xodimi bedarak ketganini ma’lum qilgan va ikki tumanda tibbiy xizmatni to‘xtatgan. Ularning aytishicha, 3 fevral kuni Lankiyendagi muassasa hukumat havo zarbasiga uchragan.

Fuqarolik urushi soyasi

2011 yilda mustaqillikka erishgan Janubiy Sudan siyosiy raqobat, korrupsiya va qurolli to‘qnashuvlardan xalos bo‘la olmayapti. 2018 yilda Prezident Salva Kiir va uning asosiy raqibi Riyek Machar o‘rtasida imzolangan hokimiyatni bo‘lish kelishuvi so‘nggi yilda yemirildi. Birlashgan Millatlar Tashkiloti mamlakat “to‘liq fuqarolik urushiga qaytish” xavfi ostida ekanini bir necha bor ogohlantirgan.