Toshkentda issiq suv va issiqlik ta’minoti tariflari oshiriladi

Toshkent shahrida aholi uchun issiq suv va issiqlik ta’minoti tariflari 15 foizga oshiriladi. Bu haqdagi qarorga joriy yilning 27 oktyabrda poytaxt hokimi Shavkat Umurzoqov imzo chekkan.

Unga ko‘ra:

• Bazaviy tarif QQSsiz 711 ming 641 so‘m/Gkal;
• aholi uchun QQSsiz 139 ming 860 so‘m/Gkal;
• byudjet tashkilotlariga QQSsiz 952 ming 797 so‘m/Gkal;
• boshqa ulgurji xizmatlar ko‘rsatuvchi tashkilotlarga QQSsiz 342 ming 296 so‘m/Gkal miqdorida narx (tarif)lar qo‘llanishi ma’qullangan.

Qarorda aholiga issiqlik ta’minoti xizmatlari bo‘yicha pasaytirilgan tariflar qo‘llanilishi oqibatida yuzaga keladigan zararlar va investitsion xarajatlarga asoslantirilgan hisob-kitoblarga muvofiq Toshkent shahar mahalliy byudjeti hisobidan har oyda subsidiyalar ajratish orqali qoplab berilishi qayd etilgan.

Bunda subsidiya mablag‘lari “Veolia Energy Tashkent” MCHJ XK va Toshkent shahar Davlat-xususiy sheriklik bo‘limi tomonidan taqdim qilinadigan hisob-kitoblarga ko‘ra o‘zgarmas, o‘zgaruvchan xarajatlar hamda investitsion xarajatlarga bo‘lingan holda moliyalashtirib berilishi ko‘zda tutilgan.