Ukrainaga yuborilgan har qanday xorijiy qo‘shin biz uchun nishon – Rossiya

G‘arb hukumatlari tomonidan Ukrainaga yuboriladigan har qanday qo‘shinlar Rossiyaning “qonuniy jangovar nishonlar” bo‘ladi. Bu haqda bugun, 8 yanvar kuni Rossiya tashqi ishlar vazirligi vakili Mariya Zaxarova ma’lum qildi.

Uning bu bayonoti Buyuk Britaniya va Fransiya sulh tuzilgan taqdirda Ukrainaga ko‘p millatli kuchlarni joylashtirish rejalarini e’lon qilganidan so‘ng yangradi.

Bildirilishicha, Rossiya 6 yanvar kuni Parijda bo‘lib o‘tgan “Ko‘ngillilar koalitsiyasi”ning yig‘ilishiga birinchi marta javob qaytargan. Rossiya Tashqi ishlar vazirligi munosabatida Ukraina tarafdori G‘arb hukumatlari koalitsiyasining “harbiy bayonotlari” tobora xavfli bo‘lib borayotgani aytilgan.

Fransiya Prezidenti Emmanuel Makron minglab qo‘shinlar yuborishi mumkinligini aytgan. Buyuk Britaniya Bosh vaziri Kir Starmerning aytishicha, bu “Britaniya, Fransiya va hamkor kuchlar Ukraina tuprog‘ida faoliyat yuritishi, Ukraina osmoni va dengizlarini himoya qilishi va kelajakda Ukraina qurolli kuchlarini qayta tiklashi” mumkin bo‘lgan huquqiy asos yaratishga yo‘l ochadi.

“ Rossiya G‘arb harbiy bo‘linmalari, harbiy inshootlari, omborlari va boshqa infratuzilmalarning Ukraina hududiga joylashtirilishi nafaqat Rossiya, balki boshqa Yevropa mamlakatlarining xavfsizligiga bevosita tahdid soladigan xorijiy aralashuv sifatida tasniflanishi haqida ogohlantirmoqda”, deyiladi Moskva bayonotida.

Shuningdek, bayonotda G‘arb siyosatchilarining bu intilishlarni o‘z cho‘ntaklaridan moliyalashtirishga majbur qilayotgani ta’kidlangan. 

“Barcha bunday bo‘linmalar va inshootlar Rossiya Qurolli kuchlarining qonuniy jangovar nishonlari hisoblanadi. Ushbu ishtirokchilarning rejalari Yevropa qit’asi va uning aholisi kelajagi uchun tobora xavfli va halokatli bo‘lib bormoqda, ularni ham G‘arb siyosatchilari bu intilishlarni o‘z cho‘ntaklaridan moliyalashtirishga majbur qilmoqdalar”, deyiladi xabarda.

Ma’lumot o‘rnida, 2022 yil fevral oyida Ukrainaga to‘liq ko‘lamli bostirib kirishni amalga oshirgan Rossiya Ukrainaning NATOga qo‘shilishi va Rossiyaga tahdid qilish uchun platforma sifatida ishlatilishining oldini olish uchun aralashishga majbur bo‘lganini da’vo qiladi. Mamlakat rasmiylari G‘arb kuchlarining Ukrainada joylashishini hech qachon qabul qilmasligini doimiy ravishda ta’kidlab keladi.

Ukraina va uning ittifoqchilarining so‘zlariga ko‘ra, kelajakda Rossiyaning yana bir bosqinining oldini olish uchun Ukraina har qanday tinchlik kelishuvining bir qismi sifatida qat’iy xavfsizlik kafolatlariga muhtoj.

Qo‘shma Shtatlar Ukrainaga o‘z qo‘shinlarini yuborishni rad etgan, ammo uning maxsus vakili Stiv Uitkoff 6 yanvar kuni Parijda bo‘lib o‘tgan uchrashuvda Prezident Donald Tramp Ukrainaga kelajakdagi hujumlarning oldini olishga qaratilgan xavfsizlik protokollarini “qat’iy qo‘llab-quvvatlashini” aytgan.