“O‘zbeklar yem bo‘lmoqda”. Rossiya armiyasi safida halok bo‘lganlar soni ochiqlandi

Ukraina Mudofaa vazirligi va Bosh razvedka boshqarmasi ko‘magida tashkil etilgan “Xochu jit” (“Yashashni xohlayman”) loyihasi Ukrainaga qarshi urushda qatnashish uchun Rossiya Qurolli kuchlari safida yollanib, halok bo‘lgan yoki bedarak yo‘qolgan 481 nafar O‘zbekiston fuqarosining ism-sharifini e’lon qildi. Ro‘yxat loyihaning ijtimoiy tarmoqlardagi sahifalarida e’lon qilindi.

“Biz Rossiya yollanma askarlari sifatida xizmat qilish paytida halok bo‘lgan 481 nafar o‘zbekistonlik fuqaroni aniqladik”, deyiladi xabarda. 

Loyihaga ko‘ra, halok bo‘lgan va bedarak yo‘qolganlarning haqiqiy soni bir necha baravar ko‘p bo‘lishi mumkin. Qo‘shimcha qilinishicha, O‘zbekiston hozirda Rossiya Qurolli kuchlarida xorijiy yollanma askarlar soni bo‘yicha dunyoda yetakchilik qilmoqda. 

“Biz Ukrainaga qarshi jang qilgan yoki jang qilayotgan kamida 2715 nafar O‘zbekiston fuqarosining ismlarini bilamiz va ularning soni yildan-yilga ortib bormoqda. 2023 yilda 498 nafar o‘zbekistonlik, 2024 yilda esa yana 941 nafar o‘zbekistonlik shartnoma imzolagan. 2025 yilning dastlabki olti oyida Rossiya Qurolli kuchlari bilan urushga qariyb 1300 nafar o‘zbekistonlik fuqaro ketgan. Iltimos, e’tibor bering, bular faqat bizda ishonchli ma’lumotlarga ega bo‘lganlargina xolos”, deyiladi loyiha xabarida. 

Bildirilishicha, O‘zbekiston shuningdek, xorijiy harbiy asirlar orasida muntazam ravishda birinchi o‘rinda turadi.

Qayd etilishicha, 2025 yilda Rossiyaga 1,8 million o‘zbekistonlik borgan. Ularning aksariyati mehnat muhojirlari sifatida Rossiya yerlariga qadam qo‘ygan, ammo hammasi ham ish topa olmagan. 

“Migrant ishchilar rossiyalik yollovchilar uchun asosiy xomashyo manbai hisoblanadi. Bugungi kunda Rossiyada odam savdosi samarali ravishda qonuniylashtirilgan. Rossiya Mudofaa vazirligi kelajakdagi xudkush terrorchilarni shartnomalar imzolash uchun olib kelganlarga mukofotlar to‘laydi. Yollovchilar, politsiya xodimlari va tergovchilar urushga yozgan har bir kishi uchun to‘lov oladi. Hech kim bu odamlarning sifatini hisobga olmaydi – asosiysi, ularning ikki qo‘li va ikki oyog‘i bor. Shuning uchun Markaziy Osiyo mamlakatlaridan kelgan migrantlar mazali taomdir. Ularni ishontirish, fuqarolik ishlari takliflari bilan aldash, deportatsiya bilan tahdid qilish yoki jinoiy ayblovlar bilan tahdid qilish mumkin. Eng muhimi, shartnoma imzolangan”, deyiladi xabarda. 

Loyihaning ta’kidlashicha, o‘zbekistonliklar Rossiya istilochi armiyasi uchun “yem” bo‘lib qolishda davom etmoqda.

Eslatib o‘tamiz, avvalroq Ukraina Mudofaa vazirligi va Bosh razvedka boshqarmasi ko‘magida tashkil etilgan “Xochu jit” (“Yashashni xohlayman”) loyihasi Ukrainaga qarshi urushda qatnashish uchun Rossiya Qurolli kuchlari bilan shartnoma imzolagan 902 nafar O‘zbekiston fuqarosining ism-sharifini e’lon qilgandi.