“Ya toje xochu shokoladku”. Mem yulduzi frontda halok bo‘ldimi? (video)

Kecha, 22 may kuni internetda Ukraina televideniyesidagi “Koxana, mi vbivaєmo dіtey” realiti-shousida shokolad haqida aytgan gapi tufayli mashhur bo‘lgan 19 yoshli Isaak Velichkoning go‘yoki frontda halok bo‘lgani haqida xabarlar tarqala boshladi.

Qayd etilishicha, fojia go‘yoki Konstantinovskiy yo‘nalishida sodir bo‘lgan va yigit Ukraina qurolli kuchlari safiga “18-24 shartnoma” bo‘yicha qo‘shilgan. Biroq yakunda bu ma’lumot tasdiqlanmadi.

Bunday soxta xabar qayerdan paydo bo‘lganini aniq tushunish juda qiyin. Gap shundaki, Ukraina ommaviy axborot vositalari Isaak Velichkoning o‘limi haqidagi xabar Rossiya manbalarida paydo bo‘lganini, Rossiya kanallari esa, o‘z navbatida, mahalliy manbalarga tayanganini yozgan.

Ammo Ukraina OAVlari “Men ham shokolad istayman” degan mem yulduzining olamdan o‘tganini 22 may kuni kechki soat to‘qqizdan keyin inkor qila boshladi. Isaak Velichkoning singlisi akasining o‘limi haqidagi xabarni rad etgani va u aslida yaxshi ekani haqida xabar berilgan edi. Ammo shuni ta’kidlash kerakki, qizning gapi hali hech qayerda e’lon qilinmagan.

Isaak Velichko 2006 yilda Cherkas viloyatining Chigirin shahrida tug‘ilgan va bolaligini juda qiyin o‘tkazgan. Isaak Velichkoning otasi oilani tashlab ketgan va u onasi bilan yaxshi munosabatlar o‘rnatolmagan. Velichko ukrainaliklar orasida “Koxana, mi vbivaєmo dіtey” loyihasida ishtirok etganidan so‘ng tanildi: 

“U o‘ziga shokolad sotib oldimi? Sen ahmoq! Ehtimol, men ham shokolad istarman!” degandi u.

O‘shanda mutaxassislar bolaga onasi bilan nizolarni hal qilishda yordam berdi va u o‘zgara boshladi.

2016 yilda Isaak Velichko yana televizorda paydo bo‘ldi, ammo bu safar “Master Chef Kids” pazandalik loyihasida. Afsuski, u shouda uzoq vaqt qola olmadi.
Televizorda chiqish Isaak Velichkoni maktab yillarida tengdoshlari orasida haqiqiy yulduzga aylantirdi. O‘sha paytda u KVN jamoasida o‘ynagan va robototexnikaga qiziqardi. Va maktabni tugatgandan so‘ng, yigit Bogdan Xmelnitskiy nomidagi Cherkas milliy universitetiga o‘qishga kirdi.