Jenevadagi muzokaralar natijalari yetarli emas – Zelenskiy

Ukraina Prezidenti Vladimir Zelenskiy Jenevada Rossiya delegatsiyasi bilan o‘tkazilgan ikki kunlik muzokaralar natijalarini yetarli emas deb baholadi. Bu haqda u kecha, 18 fevral kuni e’lon qilgan videomurojaatida so‘z ochdi.

Zelenskiyga ko‘ra, delegatsiyalar o‘rtasidagi aloqalar jiddiy va mazmunli bo‘lgan. Shu bilan birga, nozik siyosiy masalalar, ehtimoliy murosalar hamda ikki davlat rahbarlari uchrashuvi zarurati bilan bog‘liq jihatlar hali yetarlicha ishlab chiqilmagan. U navbatdagi uchrashuvni yana fevral oyida o‘tkazish maqsadga muvofiq bo‘lishini bildirgan.

Prezident, shuningdek, delegatsiyaga gumanitar yo‘nalishni ham muhokama qilish vazifasi qo‘yilganini aytgan. Uning so‘zlariga ko‘ra, harbiy asirlar almashinuvi va tinch aholining ozod etilishi masalalari dolzarb hisoblanadi. U Ukraina Qurolli kuchlarining sa’y-harakatlari nafaqat harbiy, balki gumanitar va diplomatik natijalar ham berayotganini qayd etgan.

Zelenskiy muzokaralarda Fransiya, Buyuk Britaniya, Germaniya, Italiya hamda mezbon sifatida Shveysariya vakillari ishtirok etganini muhim deb atagan va Ukraina doimo Yevropaning muzokara jarayonida qatnashishi tarafdori bo‘lib kelganini ta’kidlagan.

17–18 fevral kunlari o‘tgan muzokaralarda Rossiya delegatsiyasiga Vladimir Medinskiy boshchilik qildi. U maslahatlashuvlarni og‘ir, ammo ishchan ruhda o‘tgan deb ta’riflab, yaqin orada navbatdagi bosqich o‘tkazilishini ma’lum qildi. Ukraina delegatsiyasiga rahbarlik qilgan Rustam Umarov ayrim masalalarda aniqlik kiritilganini, biroq tafsilotlarni hozircha oshkor etib bo‘lmasligini bildirdi.

Oldinroq, Rossiya Prezidentining matbuot kotibi Dmitry Peskov Vladimir Putin va Zelenskiy uchrashuvi faqat Moskvada o‘tishi mumkinligini aytgan edi. Bunga javoban Ukraina rahbari Moskvaga bora olmasligini, biroq Rossiya va Belarusdan tashqari istalgan mamlakatda uchrashishga tayyorligini bildirgan.

Eslatib o‘tamiz, kecha, 18 fevral kuni Rossiya, Ukraina va AQSH vakillari Jenevada Ukrainadagi urushni to‘xtatish masalasidagi muzokaralarning navbatdagi kuni o‘tkazilgandi.