АҚШ Эрон ядровий объектларига зарба бермоқчи 

Эрондаги тартибсизликлар кучайиб бораётган бир пайтда, Пентагон АҚШ президенти Дональд Трампга “12 кунлик уруш” вақтида берилган зарбалардан-да кенгроқ қамровдаги вариантларни тақдим этди. Бу ҳақда “Israel Hayom” нашри “The New York Times”га таяниб хабар берди.

Қайд этилишича, Дональд Трамп Эрон масаласида икки йўналишли стратегияни қўлламоқда: бир томондан дипломатик йўлларни изламоқда, иккинчи томондан намойишчиларга қарши кескин чораларни тўхтатиш мақсадида ҳарбий зарбаларни кўриб чиқмоқда. Пентагон вакиллари Оқ уйга Эроннинг ядро инфратузилмаси ва баллистик ракета базаларини нишонга олиш имкониятларини тақдим этганини айтишган. 

Бироқ манбага кўра, кенг қамровли ҳужумларнинг бўлиш эҳтимоли чекланган жавоблар, масалан киберуруш ёки ички хавфсизлик органларига нишонли зарбаларнинг амалга оширилишига нисбатан камроқ. 

Оқ уй матбуот котиби Кэролайн Ливитт ҳаво зарбалари “кўплаб вариантлардан бири” экани, лекин дипломатия доимо биринчи вариант эканини айтган. У шунингдек, Теҳрондан келаётган хабарлар жамоатчиликдаги баёнотлардан кескин фарқ қилиши мумкинлигини билдирган.

“Сиз Эрондан эшитаётган гапларингиз, маъмуриятга шахсий равишда келаётган хабарлардан кескин фарқ қилади. Президент бу хабарларни синчиклаб ўрганиб чиқмоқда”, деган у. 

Маълумки, Трамп 11 январь куни Теҳрон “қизил чизиқни” кесиб ўтганини билдирган эди.

“Баъзи одамлар ўлиши керак эмас эди, лекин улар ҳалок бўлмоқда. Бу зўравонлар – уларни етакчилар деб аташ мумкинми, мен билмайман. Менимча, улар зўравонлик билан ҳукмронлик қилмоқда. Аммо биз бу масалани жиддий кўриб чиқяпмиз. ҳарбийлар ҳам кўриб чиқмоқда. Бизда бир неча вариантлар мавжуд”, деган Трамп.  

Президент шунингдек, Эрон билан савдо қилаётган ҳар қандай мамлакатга 25 фоиз тариф солишини айтиб таҳдид қилди.
 
Бу эса энг кўп Хитойга таъсир қилади. Трампнинг бу ҳаракатлари апрель ойида Си Цзиньпин билан бўладиган учрашув олдидан Хитой билан барқарорликни сақлашга бўлган ҳаракатларга жиддий путур етказиши мумкин.