АҚШ ва Украина 800 млрд долларлик шартнома имзолаши мумкин

Украина Президенти Владимир Зеленский ва АҚШ Президенти Дональд Трамп жорий йил январь ойининг охирида 800 миллиард долларлик шартнома имзолаши мумкин. Бу ҳақда “The Telegraph” хабар берди.

Манбаларга кўра, битим 19-23 январь кунлари Давосда бўлиб ўтадиган Жаҳон иқтисодий форуми доирасида имзоланиши тахмин қилинмоқда. Келишувга мувофиқ, 800 миллиард доллар маблағ ўн йил давомида Украинани қайта тиклаш ва унинг иқтисодиётини ишга тушириш учун йўналтирилади. Зеленский бу келишув иқтисодий тикланишни таъминлаши, иш ўринларини қайта яратиши ва ҳаётни Украинага қайтаришини айтмоқда.

Нашрнинг ёзишича, ҳужжат хусусий компаниялар томонидан ушбу маблағларни жалб қилиш мақсадида кредитлар, грантлар ва инвестиция имкониятлари сериясига йўл очиб беради. Доналд Трампнинг махсус вакили Стив Уиткоффнинг сўзларига кўра, дастурга дунёдаги энг йирик инвестиция гуруҳи – BlackRock ҳам қўшилади. Келишув тафсилотлари ҳозирча ошкор этилмаган.

“Bloomberg”нинг хабар беришича, Украина етакчиси мамлакатни тиклаш бўйича чоралар пакети доирасида АҚШ билан эркин савдо тўғрисидаги эҳтимолий келишувни ҳам муҳокама қилаётганини билдирган. Зеленскийнинг айтишича, ташаббус, хусусан, Вашингтон билан савдода ноль бож ставкаларини жорий этишни кўзда тутади.

Украина ва АҚШ ўртасида эркин савдо тўғрисидаги келишувни тезлаштириш масаласи аввалроқ, 2025 йил декабрь ойининг охирида Флоридада Зеленский ва Трамп ўртасида бўлиб ўтган учрашувда, тинчлик режаси доирасида муҳокама қилинган. Шунингдек, Зеленский Украинага 50 йил муддатга хавфсизлик кафолатлари бериш имкониятини кўриб чиқишни таклиф этган. Унинг сўзларига кўра, Трамп бу таклифни ўйлаб кўришга ваъда берган.