АҚШ Венесуэла билан ҳамкорлик учун куч ишлатмоқчи

АҚШ ҳукумати Венесуэла раҳбариятидан “максимал даражада ҳамкорлик”ни таъминлаш учун, агар бошқа усуллар самара бермаса, куч ишлатишга тайёр. Бу ҳақда АҚШ Давлат котиби Марко Рубио Сенатнинг халқаро муносабатлар бўйича қўмитасидаги эшитувда маълум қилди.

Рубионинг айтишича, АҚШ аввало дипломатик ва сиёсий усуллардан фойдаланишга ҳаракат қилади, бироқ зарурат туғилса, куч ишлатишдан ҳам воз кечмайди.

“Агар бошқа усуллар самара бермаса, биз максимал ҳамкорликни таъминлаш учун куч қўллашга тайёрмиз, умид қиламизки, бунга ҳожат қолмайди, аммо Америка халқига бўлган бурчимиз ва бу минтақадаги вазифамиздан ҳеч қачон чекинмаймиз”, деган Рубио.

Рубио вақтинча Венесуэла раҳбари ҳисобланган Делси Родригес АҚШ компаниялари учун мамлакатнинг энергетика секторини очишга ваъда берганини айтган. Унинг сўзларига кўра, Венесуэла нефть қазиб олишда Америка компанияларига имтиёзли кириш ҳуқуқи бериши, шунингдек, нефть савдосидан тушган маблағларни АҚШ маҳсулотларини сотиб олишга йўналтириши мумкин.

Эслатиб ўтамиз, аввалроқ Венесуэланинг муваққат ҳукумати Президент Николас Мадуро ҳокимиятдан четлатилиб, Делси Родригес вақтинча раҳбар этиб тайинлаганидан кейин камида 4 нафар АҚШ фуқаросини ва ўнлаб маҳбусларни озод қилганди.