АҚШда самолёт автомобиль йўлига қўнди (видео)

АҚШнинг Жоржия штати Гейнсвилл шаҳрида бир двигателли самолёт автомобиль йўлига мажбурий қўнишни амалга оширди, ҳодиса оқибатида икки киши жароҳат олди. Бу ҳақда “The New York Post” хабар берди.

Маълумотларга кўра, Hawker Beechcraft BE-36 русумли ҳаво кемасининг двигатели Гейнсвиллдан ҳавога кўтарилиш вақтида ишдан чиққан. Шундан сўнг экипаж самолётни автомобиль йўлининг гавжум чорраҳасига қўндиришга қарор қилган. Қайд этилишича, самолёт учта автомобилга тегиб кетган ва йўлтанламас автомобилнинг орқа қисмидаги ёқилғи бакини уриб чиқариб юборган.

Маҳаллий полиция бўлими капитани Кевин Ҳолбрукнинг айтишича, самолёт ҳеч бир устун ёки электр узатиш линиясига тегмасдан, атиги уч марта транспорт воситалари билан тўқнашган.

Телеканал хабарига кўра, ҳодиса оқибатида жароҳат олган икки киши шифохонага етказилган.

Эслатиб ўтамиз, аввалроқ Австралиянинг жанубий қирғоғида жойлашган пляж яқинида енгил самолёт океанга қулаб тушганди.