АҚШда спорт жамоаси авиаҳалокатга учради

АҚШнинг Техас штатида пиклбол жамоасини олиб кетаётган енгил самолёт ҳалокатга учради. Оқибатда беш киши ҳалок бўлди. Бу ҳақда маҳаллий ҳокимиятга таяниб, “Associated Press” хабар берди.

Манбага кўра, фожиа жорий йилнинг 30 апрель куни Остиндан тахминан 64 км узоқликда жойлашган Уимберли ҳудудида содир бўлган. Cessna 421C самолёти Амариллодан учиб, Нью-Браунфелсга йўл олган эди.

Самолёт бортида “Амарилло” пиклбол клуби аъзолари ҳам бўлган. Улар пиклбол мусобақасида иштирок этиш учун йўлга чиққан эди. Клуб вакили Дэн Дайернинг айтишича, яна бир самолёт ҳам бир вақтнинг ўзида Амариллодан учиб, манзилга эсон-омон етиб борган.

АҚШ Миллий об-ҳаво хизмати маълумотига кўра, ҳалокатдан олдин Нью-Браунфелс ҳудудида об-ҳаво асосан булутли бўлган, тахминан икки соатдан сўнг эса момақалдироқ кузатилган.

Маълумот учун, пиклбол – бадминтон, теннис ва стол тенниси элементларини бирлаштирган спорт тури ҳисобланади.