АҚШда сўнгги 1 центлик танга зарб этилди

АҚШ ҳукумати бир центлик тангаларни зарб этишни тўхтатди. Бу қарор пеннининг долзарблиги йўқолгани ва ишлаб чиқариш қимматга тушаётганлиги билан изоҳланган. Бу ҳақда АҚШ Молия вазирлигига таяниб, “The New York Times” хабар беради.

АҚШда пенни 232 йил давомида чиқариб келинган. Нашрнинг ёзишича, зарб этиш харажатларининг ошиши истеъмолчиларнинг хатти-ҳаракатлари ва технологиялардаги ўзгаришлар оқибатида пеннининг чиқарилиши “молиявий жиҳатдан барқарор бўлмаган” ва кераксиз ҳолга келган. Бир дона тангани ишлаб чиқариш нархи 3,69 центга етган, ўн йил аввал эса бу кўрсаткич 1,42 цент бўлган.

Сўнгги пеннилар кеча, 12 ноябрь куни Филадельфияда зарб этилган. Шунга қарамай, танга қонуний тўлов воситаси мақомини сақлаб қолади.

Қайд этилишича, АҚШ Молия вазирлиги май ойидаёқ пенни зарб этишни тўхтатиш режалари ҳақида хабар берган. Ўшанда вазирлик тангалар учун сўнгги бўш штамплар партияси буюртма қилинганини билдирган.

АҚШ Президенти Дональд Трамп эса февраль ойидаёқ Молия вазирлигига пеннини ишлаб чиқаришни тўхтатиш топшириғини берган, уни “исрофгарчилик” деб атаган. Унинг топшириғидан сўнг ёқилғи қуйиш шохобчалари, тезкор овқатланиш тармоқлари ва йирик дўконлар нархларни ҳамда нақд ҳисоб-китобларни яхлитлаш бошлаган.

Пенни 1792 йилда АҚШда зарбхона ташкил этилганидан кейин босиб чиқарилган биринчи тангалардан бири бўлган. Зарбхона сайтида қайд этилишича, дастлабки пенни эркинликни ифодаловчи, сочлари ҳилпираб турган аёл тасвири билан безатилган бўлиб, у тўлиқ мисдан ясалган. Шу вақтдан буён пеннининг дизайни ва таркиби бир неча бор ўзгартирилган. Масалан, 1909 йилда Авраам Линкольн таваллудининг 100 йиллиги муносабати билан у АҚШ тангаларида тасвирланган биринчи президентга айланган. Ҳозирги пенни эса мис ва рух аралашмасидан тайёрланади.

Эслатиб ўтамиз, аввалроқ Тожикистонда мамлакатнинг миллий валютаси – сомони жорий этилганининг 25 йиллигига бағишлаб 100 сомонилик юбилей банкноталар муомалага чиқарилганди.