Алиев АҚШнинг Трампдан олдинги икки раҳбарини танқид қилди (видео)

Озарбайжон Президенти Илҳом Алиев АҚШнинг Дональд Трампдан аввалги икки маъмурияти – Обама-Байден ҳамда Байден-Блинкен даврида Баку ва Вашингтон ўртасидаги муносабатлар кутилган даражада бўлмаганини айтди. Бу ҳақда Алиев кеча, 5 январь куни маҳаллий телеканалларга берган интервьюсида сўз юритган.  

Озарбайжон етакчисининг айтишича, Обама-Байден маъмурияти даврида томонлар ўртасидаги муносабатлар совуқ бўлган бўлса, Байден-Блинкен маъмурияти вақтида бу муносабатлар деярли инқироз ҳолатига келиб қолган. Алиевнинг таъкидлашича, агар Байден маъмурияти ҳокимиятда қолганида, Озарбайжон АҚШ томонидан билдирилган талабларнинг бирортасини ҳам бажармаган бўларди. 

Шу билан бирга, Илҳом Алиев Дональд Трамп раҳбарлигидаги АҚШ маъмуриятини алоҳида эътироф этган. Унинг сўзларига кўра, Трамп жамоаси прагматик, профессионал ва АҚШнинг миллий манфаатларини аниқ тушунадиган сиёсатчилардан иборат. 

“Оқ уйда Трамп маъмурияти иш бошлагач, вазият тубдан ўзгарди. Айнан шу даврда минтақада янги сиёсий реалликлар шаклланди”, дея таъкидлаган Алиев интервьюсида. 

Президент, шунингдек, АҚШ томонидан кучли ва ҳаққоний сиёсат олиб борилмаганида кўплаб урушлар, жумладан Озарбайжон-Арманистон урушини тугатиш ва барқарор тинчликка эришиш мушкул бўлишини қайд этган.

Эслатиб ўтамиз, Озарбайжон ва Арманистон 2025 йил 8 август куни АҚШ воситачилигида Дональд Трамп билан учрашув чоғида кўп йиллик можаролардан сўнг икки томонлама иқтисодий алоқаларни ривожлантирувчи ва уларни ўзаро муносабатларни тўлиқ нормаллаштиришга олиб келадиган тинчлик битимини имзолаган эди.