Байденнинг ўғли Трампнинг ўғилларини жангга чорлади (видео)

АҚШ собиқ президенти Жо Байденнинг 56 ёшли ўғли Хантер Байден амалдаги давлат раҳбари Дональд Трампнинг ўғиллари – 42 ёшли Эрик Трамп ва 46 ёшли кичик Дональдни “қафасдаги жанг”га (ММА) чорлади. Унинг бу ҳақдаги мурожаати кеча, 10 апрель куни “Channel 5”нинг Instagram-саҳифасида эълон қилинди.

Агар ушбу жанг бўлиб ўтса (бу шубҳали бўлса-да), у 4 июль куни нишонланадиган Америка Қўшма Штатлари мустақиллигининг 250 йиллигига бағишланиши мумкин. Хантернинг тушунтиришича, унга кинорежиссёр ва журналист Эндрю Кэллахан қўнғироқ қилиб, шундай жангни ташкил этишни таклиф қилган. 

“Менга ҳозиргина журналист Кэллахан қўнғироқ қилди. У мен, Эрик ва Дональд ўртасида қафасдаги жангни ташкил қилишга ҳаракат қилмоқда. Мен унга розилигимни айтдим. Агар у буни ташкиллаштира олса, мен 100 фоиз тайёрман”, дейди Хантер Байден.

Кэллаханнинг ўзи эса суҳбат давомида ҳақиқатан ҳам шундай вариант пайдо бўлганини, лекин у Байденнинг ўғлини ҳазил қиляпти деб ўйлаб, унга жангни ташкил этишга ёрдам беришга тайёрлигини айтганини билдирган.

Хантер Байденнинг баёнотини кенг ёритаётган Америка ОАВлари собиқ ва ҳозирги президентлар оилалари ўртасидаги муносабатлар жуда таранг эканини қайд этмоқда. Эҳтимол, клан вакиллари бир-бирларини дўппослашга тайёр, лекин буни омма олдида томоша учун қилишлари амримаҳол.

Маълумот учун, “қафасдаги жанг” – аралаш жанг санъатлари (ММА) беллашувларининг умумий номи бўлиб, унда иштирокчилар бокс, кикбоксинг, дзюдо, кураш ва Бразилия жиу-житсуси каби турли услубдаги кенг кўламли техникалардан фойдаланади.