“Жонимга тегди”. Стармер Трамп ва Путинни кескин танқид қилди

Буюк Британия Бош вазири Кир Стармер АҚШ ва Россия етакчилари – Дональд Трамп ва Владимир Путинни танқид остига олди. Бу ҳақда у ITV News телеканалига берган интервьюсида гапирди.

Британия Бош вазири Яқин Шарқдаги уруш келтириб чиқарган энергетика инқирози, шунингдек, Украинадаги уруш бошланганидан кейин энергия ресурслари нархининг ошиши Буюк Британия иқтисодиётига сезиларли даражада таъсир қилаётганини айтган.

“Бутун мамлакат бўйлаб оилалар ва корхоналар учун электр энергияси тўловларининг Путин ёки Трампнинг дунё бўйлаб ҳаракатлари туфайли гоҳ кўтарилиб, гоҳ тушиши жонимга тегди”, дейди Стармер.

Шу билан бирга, Британия Бош вазири Трампнинг жорий йилнинг 7 апрель куни айтган “бутун бир цивилизациянинг ҳалокати” ҳақидаги сўзларига изоҳ беришдан бош тортган. Кир Стармер бундай сўзларни ишлатмаслигини таъкидлаб, ҳар бир қилаётган ишида Британия қадриятларига амал қилишини билдирган.

Эслатиб ўтамиз, 7 апрель куни АҚШ Президенти Дональд Трамп Truth Social’да “бугун тунда бутун бир цивилизация ўлади” деган мазмунда пост қолдирган эди. Бундан олдин у АҚШ Эронни бир кечада йўқ қилиши мумкинлигини айтганди.

Кейинчалик АҚШ ва Эрон икки ҳафталик ўт очишни тўхтатишга келишиб олгани маълум бўлди. Дональд Трампнинг сўзларига кўра, Қўшма Штатлар Эрондан музокаралар учун асос бўлиб хизмат қиладиган 10 банддан иборат сулҳ таклиф олган.

Бугун, 10 апрель куни Покистонда томонлар ўртасида музокара бошланиши белгиланган. Эрон делегацияси аллақачон Исломободга етиб боргани айтилмоқда.