Бишкекда Эронни қўллаб-қувватловчи митинг бўлиб ўтади

Эртага, 3 март куни Қирғизистон пойтахти Бишкекда Эрон халқи билан бирдамлик белгиси сифатида тинч митинг-реквием ўтказилади. Бу ҳақда “24.kg” хабар берди.

Ташкилотчиларнинг маълумотларига кўра, Қирғизистон фуқаролик фаоллари Эрон Ислом Республикаси халқига, АҚШ ва Исроилнинг ҳарбий тажовузи оқибатида ҳалок бўлганларнинг оилаларига ҳамдардлик билдириш ва уларни қўллаб-қувватлашни ният қилган.

“Эрон фавқулодда хизматлари маълумотларига кўра, 2026 йил 28 февралдан бошлаб Эронда 555 нафар тинч аҳоли ҳалок бўлди, уларнинг 170 нафари мактаб ўқувчи қизларидир. Ҳалок бўлганлар орасида Эрон Олий раҳбари Али Хоманаий, юқори мартабали генераллар ва ҳарбий хизматчилар, шунингдек, оддий фуқаролар бор. Шунингдек, 100 га яқин бола жароҳатлангани хабар қилинмоқда”, дейилади хабарда.

Митинг ташкилотчилари акция фақат тинч ва инсонпарварлик характерига эга эканлигини таъкидламоқда. Унинг мақсади – ҳалок бўлганлар хотирасини ёд этиш, жабрланганларга ҳамдардлик билдириш ва тинч аҳоли фожиасига эътибор қаратишдир.

Фаоллар, шунингдек, Эронни ташқи босимга очиқчасига қарши турган ҳамда халқаро ҳуқуқ доирасида ўз суверенитети, фуқаролар хавфсизлиги ва ҳудудий яхлитлигини ҳимоя қилаётган давлат сифатида қарашларини қайд этган.

Уларнинг сўзларига кўра, ҳозирги эскалация минтақавий можаро доирасидан чиқиб кетган ва халқаро муносабатларнинг кенгроқ инқирозини акс эттирмоқда. Бу инқироз Эрон билан бевосита яқинликда бўлган ва умумий чегараларга эга Марказий Осиё ҳамда Жанубий Кавказ мамлакатлари учун бевосита хавф туғдиради.

Митинг иштирокчилари реквиемни қайғу ва бирдамлик муҳитида, зўравонликка чақириқларсиз, ҳарбий ҳаракатларни тўхтатиш, тинч аҳолини ҳимоя қилиш ва халқаро ҳуқуққа риоя қилиш зарурлигига урғу берган ҳолда ўтказишни режалаштирмоқда.

Акция ўтказиладиган сана ва жой: Қирғизистондаги Эрон элчихонаси дарвозаси олдида соат 13:00 да.

АҚШ–Исроил–Эрон уруши

Кеча, 28 февраль куни Исроил кутилмаган вақтда Эронга қарата ҳаводан зарбалар йўллади. Ушбу зарбалар Эроннинг муҳим объектлари – Президент қароргоҳи, давлат идоралари ва ядро иншоотларига теккани иддао қилинмоқда. Эроннинг “Mehr” ахборот агентлиги Теҳрондаги Эрон разведка биносига ҳам ҳужум қилинганини ёзган. Дастлабки манбаларга кўра, Эронга ўттиздан ортиқ ракеталар йўлланган бўлиши мумкин.

Орадан бироз вақт ўтиб Исроил Мудофаа кучлари Эронга ҳужумни расман тасдиқлаган. Шунингдек, Мудофаа вазирлиги Исроил фуқароларидан хавфсиз жойга яширинишни сўраган. Мамлакатда шошилинч равишда фавқулодда ҳолат эълон қилинган.

Шу орада АҚШ Президенти Дональд Трамп Эрон бўйича операциялар ҳақида 8 дақиқалик баёнот берган ва унда Эронга қилинган ҳужумда АҚШнинг иштирок этганини тасдиқлаган. Унинг қайд этишича, Эронга қилинган ҳарбий опреациялар Америка халқини ҳимоя қилиш учун амалга оширилмоқда. У ўз баёнотида эронликларни амалдаги тузумни ағдаришга чақирган. Трамп Эрон ҳарбий хизматчиларига таслим бўлишни ва бунинг эвазига “иммунитет” олишни таклиф қилди ёки “муқаррар ўлим”ни танлашлари мумкинлигини айтган.

Қолаверса, барча воқеаларни бир четдан кузатиб турган Эрон собиқ валиаҳд шаҳзодаси Ризо Паҳлавий ҳам Эрон халқига мурожаат қилиб, мамлакат учун ҳал қилувчи лаҳзалар келганини таъкидлаган. Шунингдек, у бу сўнгги жанг эканини ва унда Эрон халқи Ислом Республикаси тузуми устидан ғалаба қозонишини таъкидлаган.

Орадан кўп вақт ўтмай энди Эрон Исроил давлати ҳудудига қарата зарба йўллашни бошлади.

Исроил Бош вазири Биньямин Нетаньяху ҳам ҳужумларни тасдиқлаб, баёнот берган. Унга кўра, Исроил ва АҚШнинг Эронга қарши қўшма операцияси Эрон террор режими келтириб чиқараётган таҳдидни бартараф этишга қаратилган. Нетаньяху махсус мурожаатида сўнгги 47 йил давомида Эрон раҳбарияти Исроил ва АҚШга қарши очиқ таҳдидлар қилган ҳамда минтақада зўравонлик сиёсатини юритганини айтган.

Аввалроқ, Эрон давлат телевидениеси Хоманаий Исроил ва АҚШ томонидан ўлдирилганини хабар қилган эди. Эроннинг “Tasnim” ахборот агентлиги маълумотларига кўра, у кеча, 28 февраль куни эрталаб ўз ишхонасида ўлдирилган. Оятуллоҳнинг вафоти муносабати билан мамлакат бўйлаб 40 кунлик умумхалқ мотами ва 7 кунлик умумхалқ дам олиш кунлари эълон қилинди.

Шунингдек, Эрон ҳудудига уюштирилган ҳужум чоғида Оятуллоҳнинг оила аъзоларидан тўрт киши – қизи, куёви, набираси ва келинларидан бири ҳам ҳалок бўлган.

Қайд этиш жоиз, Эрон Ислом инқилоби қўриқчилари корпуси Ислом Республикаси Олий раҳбари Оятуллоҳ Али Хоманаийнинг вафоти тасдиқланганидан сўнг, мамлакат “Қуролли кучлари тарихидаги энг шиддатли ҳужум операцияси” бошланганини маълум қилганди.

Шундан сўнг, Эрон Ислом инқилоби қўриқчилари корпуси мамлакат Исроил ва АҚШга қарши янги ҳужумлар бошланганини эълон қилди.