БМТ Хавфсизлик Кенгаши Венесуэла бўйича фавқулодда йиғилиш ўтказади

Эртага, 5 январь куни БМТ Хавфсизлик Кенгаши АҚШнинг Венесуэладаги операцияси туфайли фавқулодда йиғилиш ўтказади. Бу ҳақда Хавфсизлик Кенгашига таяниб, “Синьхуа” хабар берди.

“Раислик душанба куни фавқулодда йиғилиш ўтказишни режалаштирмоқда”, дейди БМТ ҳузуридаги Сомали доимий ваколатхонаси матбуот котиби Хадича Аҳмад.

Маълумот учун, январь ойида БМТ Хавфсизлик Кенгашига ойлик ротация доирасида Сомали раислик қилмоқда.

Эслатиб ўтамиз, 3 январга ўтар кечаси Венесуэла пойтахи Каракасда портлашлар содир бўлди. Шундан сўнг АҚШ Президенти Дональд Трамп Қўшма Штатлар кенг кўламли зарбалар берганини, Венесуэла президенти Николас Мадуро эса рафиқаси билан бирга қўлга олиниб, мамлакатдан олиб чиқиб кетилганини маълум қилди. 

АҚШ эр-хотинга “наркотерроризм” бўйича айбловлар қўйди, яқин вақт ичида улар Америка судида жавоб бериши кутилмоқда.

Ҳозирда Венесуэла вице-президенти Делси Родригес мамлакат президенти вазифасини вақтинча бажарувчи этиб тайинланди. У аллақачон Нью-Йоркдаги Бруклин тергов изоляторига етказилган Мадуро ва унинг рафиқасини зудлик билан озод этишни талаб қилмоқда.