Буюк Британия ва Францияга кучли бўрон ёпирилди (видео)

Бугун, 9 январь куни Франциянинг шимолий қисми ва Англия жанубидаги минглаб уйлар ва корхоналар кучли шамол, ёмғир ва қор олиб келган “Горетти” бўрони сабаб электр таъминотисиз қолди. Бу ҳақда ABC News хабар берди.

Маълумотларга кўра, Англиянинг жанубида шамол тезлиги 159 км/соатга етган. Маҳаллий ҳокимликлар айрим йўллар ёпилгани ва сув етишмовчилиги ҳамда электр узилишлари ҳақида хабар берган. Мидленд ва Уэльсда 57 мингдан ортиқ хонадон электр таъминотисиз қолган.

Кучли бўрон Шимолий Шотландияга ҳам таъсир қилган. У ерда ҳафта бошида ярим метрдан ортиқ қор ёғган. Шотландия бўйлаб 250 дан ортиқ мактаблар ёпилган.

“Горетти” бўрони Францияга ҳам етиб борган ва тахминан 380 минг хонадон электрсиз қолган. Франция Миллий метеорология хизматига кўра, Нормандияда кечалари шамол тезлиги 213 км/соатга етган. Шимоли-ғарбий Францияда минтақавий поездлар тўхтатилган.

Эслатиб ўтамиз, аввалроқ Европанинг қатор мамлакатларини кучли қор қоплаб олгани ва автомобиллар тирбандликларда қолиб кетганлиги ҳақида хабар берилган эди. Йўл-транспорт ҳодисалари оқибатида бир неча киши ҳалок бўлган.