Дунё паспортлари рейтинги эълон қилинди. Ўзбекистон нечанчи ўринда?

Ўзбекистон паспорти визасиз кириш мумкин бўлган мамлакатлар сонига асосланган рейтингда 82-ўринни эгаллади. Бу ҳақда “Henley & Partners” компанияси томонидан эълон қилинган янгиланган индексда келтирилган.

Марказий Осиё мамлакатларидан рейтингда энг юқори ўринни Қозоғистон эгаллаган – 67-ўрин. Ушбу мамлакат фуқаролари 78 та давлатга бориши учун виза талаб этилмайди. Шу тариқа улар қўшни давлатларни ортда қолдирган:

• Қирғизистон 81-ўринда (62 та давлат);
• Ўзбекистон 82-ўринда (61 та давлат);
• Тожикистон 87-ўринда (55 та давлат);
• Туркманистон 93-ўринда (48 та давлат).

Лидерлар орасида Сингапур ҳали ҳам биринчи ўринда. АҚШ эса илк бор кучли ўнликни тарк этиб, 12-ўринга тушган. Россия паспорти ҳам позициясини йўқотиб, 46-ўриндан 50-ўринга тушган ва Венесуэла ҳамда Молдовадан кейинги поғонада жойлашган.

Қайд этиш жоиз, янги рейтингда биринчи учликни Осиё давлатлари эгаллаган: Сингапур – 1-ўрин (фуқаролар 227 мамлакатдан 193 тасига визасиз кира олади), Жанубий Корея – 2-ўрин (190 мамлакат), Япония – 3-ўрин (189 мамлакат).

“Henley & Partners”га кўра, “Henley Passport Index” ташкил этилганидан буён АҚШ илк бор дунёнинг энг кучли ўнта паспорти рўйхатидан чиқиб кетган. 2014 йилда ушбу мамлакат биринчи ўринда бўлган бўлса, ҳозирда 12-ўринда ва бу ўринни Малайзия билан бўлишмоқда.

Эслатиб ўтамиз, аввалроқ Черногория ҳукумати Ўзбекистон фуқаролари учун 2023 йилда жорий этилган визасиз режимни бекор қилгани ҳақида хабар берилган эди. Бунга мамлакатнинг Европа Иттифоқига аъзоликнинг 24-боби бўйича ёпилиш мезонларига мослашиши сабаб қилиб кўрсатилган.