Энди жазосини ўтаган вояга етмаган шахслар судланмаган ҳисобланади

Эндиликда Ўзбекистонда вояга етмаган шахслар учун жиноий жавобгарлик либераллаштирилмоқда. Бу жорий йил 23 октябрь куни қабул қилинган “Вояга етмаганларга нисбатан жиноий жавобгарлик янада либераллаштирилиши муносабати билан Ўзбекистон Республикасининг Жиноят кодексига қўшимча ва ўзгартиришлар киритиш тўғрисида”ги Ўзбекистон Республикаси қонунида белгиланди.

Жиноят кодексига киритилган ўзгартириш ва қўшимчаларга кўра, ўн саккиз ёшга тўлгунига қадар содир этган жинояти учун тайинланган жазони ўтаб бўлган шахс муқаддам судланмаган ҳисобланади.

Қайд этилишича, ўта оғир жиноятлар ёки содир этган жинояти учун тайинланган жазони ўтаб бўлганидан кейин ўн саккиз ёшга тўлгунига қадар қасддан янги жиноят содир этиш ҳоллари бундан мустасно.

Шунингдек, вояга етмаганларга нисбатан озодликни чеклашнинг ҳамда озодликдан маҳрум қилишнинг энг кам муддати олти ойдан бир ойгача қисқартирилган.

Маълумот учун, ушбу қонун Қонунчилик палатаси томонидан 2023 йил 4 июлда кабул қилинган, Сенат томонидан эса 2025 йил 1 августда маъқулланган.

Бунёд Келдибоев