Эрдўған Туркистонда кутилмаганда кортежини тўхтатди (видео)

Бугун, 15 май куни Туркия Президенти Ражаб Тойиб Эрдўған Туркистон шаҳри кўчаларидан бирида кутилмаганда ўз кортежини тўхтатиб, маҳаллий аҳоли билан суҳбатлашди. Бу ҳақда вилоят ҳокимлиги хабар берди. 

Туркистон вилояти ҳокимлиги Туркий давлатлар саммитига йўл олган Туркия Президентини маҳаллий аҳоли қандай кутиб олгани акс этган видеони эълон қилган.

“Туркий давлатлар ташкилотининг норасмий саммитига ташриф буюрган Туркия Президенти Ражаб Тойиб Эрдўған кортежини тўхтатиб, йўл четида унга қўл силкиб турган одамлар билан саломлашди. У туркистонликлар билан суратга тушиб, ўзининг самимий эътиборини намойиш этди”, дейилади хабарда.

Эслатиб ўтамиз, аввалроқ Ражаб Тойиб Эрдўған Қосим-Жомарт Тўқаевнинг таклифига биноан Қозоғистонга келган эди. Эрдўғаннинг ташрифи муносабати билан Мустақиллик саройи узра Қозоғистон Республикаси Ҳаво мудофааси кучларининг қирувчи самолётлари махсус намойиш парвозини амалга оширди.