Эрон ўз спортчиларига “душман” мамлакатларга саёҳат қилишни тақиқлади 

Эрон миллий ва клуб спорт жамоаларига “душман” деб баҳоланган мамлакатларга сафар қилишни тақиқлади. Бу ҳақда мамлакат Спорт вазирлиги баёнотига таяниб, “Reuters” хабар берди.

Қарор хавфсизлик нуқтаи назаридан “кейинги хабарномагача” амал қилади. Баёнотда айтилишича, Эрон спортчилари ва жамоа аъзоларининг хавфсизлигини таъминлай олмайдиган ҳамда душман деб баҳоланган давлатларда миллий ва клуб жамоаларининг иштироки тақиқланади. Бироқ қайси давлатлар рўйхатга киритилгани очиқланмаган.

Вазирлик, шунингдек, Эрон футбол уюшмаси ва клублардан Осиё футбол конфедерациясини ўйинларни “душман мамлакатлар”дан бошқа жойга кўчириш масаласида хабардор қилишни талаб қилган.

Қайд этиш жоиз, жорий йилнинг 17 март куни Эрон футбол ассоциацияси президенти Меҳди Тож терма жамоанинг 2026 йилги Жаҳон чемпионати ўйинларини АҚШдан Мексикага кўчириш бўйича музокаралар олиб борилаётганини билдирди. Бироқ FIFA ўйинлар жадвали ўзгармаслигини билдириб, барча жамоалар аввал тасдиқланган тақвим асосида иштирок этишини кутаётганини таъкидлади.

Шундан сўнг, Эрон футбол уюшмаси баёнот бериб, “биз Американи бойкот қиламиз, аммо Жаҳон чемпионатини эмас”, дея аниқлик киритди.

Маълумот учун, 2026 йилги Жаҳон чемпионати 11 июндан 19 июлгача АҚШ, Канада ва Мексика мезбонлигида ўтказилади. Унда Эрон терма жамоаси Бельгия, Миср ва Янги Зеландия билан бир гуруҳдан жой олган бўлиб, гуруҳ босқичидаги ўйинлар АҚШда ўтказилиши режалаштирилган.

Эслатиб ўтамиз, аввалроқ Эрон расмийлари мамлакат терма жамоаси футболчиси Сардор Азмуннинг мол-мулкини унинг АҚШ ва Исроил билан алоқалари туфайли мусодара қилмоқчилиги ҳақида хабар берилганди.