Банкдан 10 млн евролик буюмлар ўғирлаб кетилди

Германиянинг ғарбида жойлашган Гельзенкирхен шаҳрида номаълум шахслар Sparkasse банки филиалининг омборига бостириб кириб, мижозларга тегишли камида 10 миллион евро миқдоридаги қимматбаҳо буюмларни ўғирлаб кетди. Бу ҳақда “Deutsche Welle” хабар берди.

Полиция маълумотларига кўра, жиноятчилар Рождество байрамидан фойдаланган – мамлакатда 24 декабрь куни кечқурундан бошлаб банклар ва дўконларнинг аксарияти ёпиқ бўлган. Улар банк биносининг қалин бетон деворини тешиб ўтиб, бир неча мингта шахсий сейфларини бузган ва у ердаги нақд пуллар ҳамда қимматли буюмларни олиб кетган.

Деворидаги тешик фақат жорий йил 29 декабрь тонгида, ёнғин сигнализацияси ишга тушганидан кейин аниқланган. Кеча, 30 декабрь куни банк олдида ўнлаб норозилик билдирган мижозлар тўпланиб, ўз сейфларига кириш имконини талаб қилган. Омонат эгаларидан бири “Welt” телеканалига берган интервьюсида 25 йил давомида сейфда сақлаб келган жамғармаларининг тақдири ҳақида ҳеч қандай маълумот йўқлиги сабабли ухлай олмаганини айтган.

Полиция, шунингдек, 20 декабрь куни кечқурун гувоҳлар қўшни кўп қаватли автотураргоҳ зинапоясида катта сумкалар кўтарган бир неча эркакни кўрганини маълум қилган. Бундан ташқари, 29 декабрь куни эрта тонгда гараждан ниқоб таққан одамлар қора рангли Audi RS6 автомобили чиқиб кетгани қайд этилган. Аниқланишича, автомобилнинг давлат рақами илгари Ганноверда ўғирланган машинага тегишли бўлган.

Эслатиб ўтамиз, аввалроқ Франция Президенти Эммануэль Макроннинг расмий қароргоҳи – Елисей саройи ходими қўлга олинган. У кумуш ва чинни идишларни ўғирлашда айбланмоқда. Ўғирланган буюмларнинг умумий қиймати 40 минг еврога баҳоланмоқда.