Испания Эронни бомбалаётган АҚШ самолётлари учун осмонини ёпди

Испания АҚШнинг Эронга ҳужумларида иштирок этаётган Қўшма Штатлар самолётлари учун ўз ҳаво ҳудудини ёпди. Мамлакат ҳукумати бу ҳаракатни Эрондаги хунрезликларга кўз юма олмаслиги билан изоҳлади. Бу ҳақда, кеча 30 март куни Испания Мудофаа вазири Маргарита Роблес журналистлар билан учрашувда маълум қилди.

“Испания ҳукумати ўз ҳаво ҳудудини АҚШнинг Эронга ҳужумлари туфайли вақтинчалик ёпади. Ушбу қарор мамлакатимизни бу “ахмоқона” урушга чек қўйиш учун энг сўнгги жиддий қадами бўлиши мумкин. Биз бошиданоқ ўзимизнинг қаътий позициямизни Америка томонига билдирганмиз. Шунинг учун, Испания нафақат харбий базаларидан, балки ҳаво ҳудудидан ҳам Америка ҳарбийларининг фойдаланишига рухсат бермайди”, дейди Роблес.

Шунингдек, Испания Бош вазири Педро Санчез ҳам Американинг Эронга ҳужумини кескин қоралаб, бу ишларни келажак авлод кечирмаслигинини айтган эди.

“Менимча, Испаниянинг позицияси барчага аён. Биз бундай адолатсиз урушларда иштирок этмаймиз. Американинг ҳарбий базаларимиз ва ҳаво ҳудудимиздан ҳам фойдаланишларига йўл қўймаймиз”, дейди Санчез Испаниянинг “El Pais” газетасига берган интервьюсида.

Эслатиб ўтамиз, аввалроқ АҚШ Давлат котиби Марко Рубио “Al Jazeera” телеканалига берган интервьюсида АҚШнинг Эрон билан урушини қўллаб-қувватлашдан бош тортган НАТОдаги иттифоқчиларнинг хатти-ҳаракати сабабли Вашингтон альянс билан муносабатларни қайта кўриб чиқишини айтган эди.