Исроил ва Ливан 10 кунлик сулҳ эълон қилди

АҚШ Президенти Дональд Трамп Исроил ва Ливан етакчилари ўртасида 10 кунлик ўт очишни тўхтатиш бўйича келишувга эришилганини маълум қилди. Бу ҳақда у ўзининг Truth Social тармоғида ёзиб қолдирди.

Унинг айтишича, Ливан Президенти Жозеф Аун ва Исроил Бош вазири Биньямин Нетаньяху бугун, 17 апрель кунидан бошлаб 10 кунлик сулҳни расман бошлашга келишиб олган. 

Аввалроқ, икки давлат вакиллари 34 йил ичида илк бор Вашингтонда учрашув ўтказган. Музокараларда АҚШ Давлат котиби Марко Рубио ҳам иштирок этган.

Исроилнинг АҚШдаги элчиси Йехиэль Лейтер музокаралар самарали ўтганини билдириб, томонлар аниқ чегара белгилаш ва яқин ҳафталарда мулоқотни давом эттиришга келишганини айтган. Ливан элчиси Нада Хамаде Моавад эса АҚШга музокараларни ташкил этгани учун миннатдорлик билдириб, гуманитар вазият оғирлигини таъкидлаган.

АҚШ томонлар ўртасида бевосита музокараларни давом эттириш режалаштирилгани маълум қилган. Трамп шунингдек, вице-президент Жей Ди Вэнс ва бошқа юқори лавозимли амалдорларга барқарор тинчликка эришиш учун жараённи мувофиқлаштиришни топширган.

Эслатиб ўтамиз, аввалроқ Дональд Трамп Эрон билан боғлиқ вазиятда ҳам вақтинчалик танаффус эълон қилган эди. Бироқ ўша пайтда Исроил Ливандаги ҳарбий ҳаракатлар бу келишувга кирмаслигини билдирган.