Раул Кастронинг набираси Трампга махфий хат юборди

Куба собиқ раҳбари Раул Кастронинг набираси Родригес Кастро АҚШ Президенти Дональд Трампга махфий хат юборди. Бироқ унинг мактуби Майами аэропортида ушлаб қолинди. Бу ҳақда “The Wall Street Journal” хабар берди.

Қайд этилишича, Родригес Кастро Дональд Трамп эътиборини жалб қилиш учун ноодатий уриниш сифатида ўтган ҳафтада одатий дипломатик каналлардан ташқарида Оқ уйга шахсий мактуб етказишга уринган. 

Ушбу хат Гаванадаги бадавлат тадбиркор орқали етказишга ҳаракат қилинган. Мактуб дипломатик ёзишма услубида тайёрланган ва унда Куба расмий муҳри ҳам бўлган. Унда “Куба ҳукумати АҚШга қарши ҳарбий ҳаракат бошлаши мумкин”, деган огоҳлантириш ёзилган.

Қолаверса, ушбу яширин хатда Трампга иқтисодий ва инвестицион келишувлар, шунингдек, санкцияларни юмшатиш таклиф қилинган.

Эслатиб ўтамиз, аввалроқ Куба Президенти Мигель Диас-Канел Бермудес Дональд Трампнинг босимларига бўйин эгмаслигини ва ҳали истеъфога чиқиш нияти йўқлигини билдирганди.