Қозоғистонда Сабуровга жиноят иши очилиши мумкин 

Қозоғистонлик қизиқчи Нурлан Сабуровга Қозоғистон прокуратураси “ёлланмачилик” иши бўйича айблов қўйиши мумкин. Бу ҳақда “Central Asia” маълум қилди.

Қозоғистон Бош прокурори ўринбосари Галимжан Койгельдиев Сабуров “Легион Вагнер Истра” жангчиларига 10 та питбайк топширгани ҳақидаги маълумотлар сабабли текширув бошланиши мумкинлигини айтган. 

Сабуров Россияга кириши тақиқланишидан олдин Москва вилоятининг Истра туманида яшаган. Оммавий ахборот воситаларида очиқланган маълумотларга кўра, у россиялик ҳарбийларга питбайклар топширган.

Қозоғистонда бундай ёрдам Жиноят кодексининг 170-моддаси – “Ёлланмачилик”ка олиб келиши мумкин. Ушбу модда қуролли можароларда иштирок этиш ёки уларга кўмаклашиш учун жавобгарликни назарда тутади.

Нурлан Сабуров – стендап-комик, юморист ва киноактёр. У 1991 йил 22 декабрда Қозоғистоннинг Степногорск шаҳрида туғилган. Мактабни тугатгач, Екатеринбургга кўчиб ўтган, у ерда Урал федерал университетида ўқиган ва КВН жамоасида ҳамда стендап жанрида чиқиш қила бошлаган. 2014 йилда оиласи билан Москвага кўчиб, TNT телеканалидаги “Stund up” шоу резидентига айланган, 2019 йилда эса машҳур YouTube лойиҳаси “Что было дальше?” дастурининг бошловчиси бўлган. 2020 йиллар бошидан у фильмларда ҳам суратга тушган ва турли юмористик лойиҳаларда иштирок этган, аммо унинг сиёсий баёнотлари ва халқаро можароларга муносабати айрим мамлакатларда танқид ва концертларининг бекор қилинишига сабаб бўлган.

2025 йилнинг май ойида Сабуров Шереметево аэропортида миграция қонунчилигини бузгани учун ушланган. У Россияда рухсат этилган муддатдан ортиқ қолиб кетган ва жарима солиниб, мамлакатни тарк этиш талаби қўйилган.

2026 йил февраль ойида эса комикка Россияга 50 йил муддатга кириш тақиқи қўйилди. Сабуров Внуково аэропортига борганидан сўнг унга Россияга кириш тақиқлангани ҳақида расмий ҳужжат топширилган. Ҳодиса видеоси интернетда тарқалган, шундан кейин Сабуров депортация шартларига рози бўлмасдан, Олмаотага учиб кетган.

Маълумотларга кўра, у воситачилар орқали даромадларини яширишга уринган, бироқ санкциялардан чўчиб, Россия фуқаролигини олишдан бош тортган.

Эъзоза Олимова