Кичик Трамп отасининг ўрнини эгаллаш учун курашиши мумкин

Америка Қўшма Штатлари Президенти Дональд Трампнинг ўғли кичик Дональд Трамп 2028 йилги АҚШ президентлиги сайловларида Республикачилар партияси номзоди бўлиши мумкин. Бу ҳақда “The Hill” хабар берди.

Нашрда айтилишича, Трампнинг катта ўғли ўтган ҳафта отаси Оқ уйдан кетгандан кейин сайловларда иштирок этиш имкониятини инкор этмаган.

Шу билан бирга, вице-президенти Жеймс Дэвид Вэнс ҳам яхши имкониятга эга. Аввалроқ, бир интервьюсида Трамп Вэнс 2028 йилда унинг вориси бўлиши мумкинлигига ишора қилган эди.

Шунингдек, номзодлар орасида Давлат котиби Марко Рубио, Ички хавфсизлик котиби Кристи Ноэм ва учта губернатор ҳам бор. Нашрнинг таъкидлашича, номзодларнинг ҳеч бири қора танли эмас.

Маълумот учун, Республикачилар партияси вакили бўлган АҚШнинг амалдаги Президенти 2024 йилги сайловда ғалаба қозониб, 47-давлат раҳбари бўлди. У илгари 2017-2021 йилларда ҳам президентлик лавозимини эгаллаган. АҚШ конституциясига кўра, Оқ уйда иккинчи президентлик муддатини ўтаётган Трамп учинчи муддатга сайланиш ҳуқуқига эга эмас. Шунингдек, конституцияга киритилган тегишли тузатишга кўра, икки йилдан ортиқ давом этган ва мандати тугамаган президентлик муддатини тўлдирган кишига ҳам икки мартадан ортиқ президент этиб сайланиш тақиқланади. Конституцияни ўзгартириш учун Сенат ва Вакиллар палатасининг учдан икки қисми, шунингдек, мамлакат штатлари ҳукуматларининг тўртдан уч қисми маъқуллаши керак.

Эслатиб ўтамиз, аввалроқ Дональд Трамп учинчи президентлик муддатига номзодини қўйиш имкониятини кўриб чиқаётгани ҳақидаги маълумотни рад этганди.