Конгрессга АҚШнинг НАТОдан чиқиши бўйича қонун лойиҳаси киритилди

АҚШ Конгрессининг Вакиллар палатасидаги республикачи аъзо Томас Масси мамлакатнинг НАТОдан чиқиши бўйича қонун лойиҳасини киритди. Бу ҳақда конгрессменнинг расмий сайтида хабар берилди.

Ташаббус “Ишончсиз ташкилот тўғрисидаги қонун” (Not A Trusted Organization Act) деб номланади. Ҳужжат матнида айтилишича, Шимолий Атлантика альянси совуқ уруш даврининг мероси бўлиб, у СССРга қарши туриш учун яратилган, СССР эса бундан 30 йил аввал парчаланиб кетган. Шу вақтдан буён АҚШнинг НАТОдаги иштироки америкалик солиқ тўловчиларга триллионлаб долларга тушгани қайд этилган.

“Бизнинг конституциямиз чексиз ташқи можароларда доимий иштирокни назарда тутмаган, бундан бизни асос солувчилар огоҳлантирган. Америка дунёнинг ҳимоячиси бўлиши шарт эмас, айниқса бой давлатлар ўз мудофаалари учун тўлашдан бош тортаётган бир пайтда”, дейди Масси.

Агар ушбу қонун қабул қилинса, АҚШ Президенти 30 кун ичида мамлакатнинг блокдан чиқиши ҳақида Шимолий Атлантика альянсига хабар бериши керак бўлади. Шунингдек, америкалик солиқ тўловчиларнинг маблағларидан НАТО бюджетларини молиялаштириш тақиқланади. Массининг партиядоши, Юта штатидан сенатор Майк Ли ҳам Сенатга шунга ўхшаш қонун лойиҳасини киритган.

Қайд этиш жоиз, бунгача АҚШ Президенти Дональд Трамп ҳам бир неча бор мамлакатнинг НАТОдан чиқиши билан таҳдид қилган. У блокдаги иттифоқчиларни мудофаа харажатларининг етарли эмаслиги учун танқид қилган. Шундан сўнг альянс давлатлари 2035 йилга қадар мудофаа харажатларини ЯИМнинг 5 фоизигача ошириш мажбуриятини олган. Шу билан бирга, Жо Байден президентлиги даврида конгресс ҳар қандай АҚШ Президентига НАТОдан чиқишни тақиқловчи қонун лойиҳасини маъқуллаган. Ташаббус ҳаммуаллифлари орасида ҳозирги Давлат котиби Марко Рубио ҳам бўлган, аммо “Politico”нинг ёзишича, Трамп бу тақиқни Президентнинг ташқи сиёсат бўйича ваколатларидан фойдаланиб четлаб ўтиши мумкин.

Трамп даврида қабул қилинган янги АҚШ Миллий хавфсизлик стратегиясида НАТОнинг “доимий кенгайиб бораётган альянс” сифатида қабул қилинишига йўл қўймаслик зарурлиги қайд этилган. Ҳужжатда, шунингдек, Вашингтон бундан буён “Атлант каби бутун жаҳон тартибини ўз елкасида кўтариб турмаслиги” таъкидланган.

Эслатиб ўтамиз, аввалроқ Қўшма Штатлар Европадан 2027 йилгача НАТО мажбуриятларининг асосий қисмини, жумладан, ракета ишлаб чиқариш ва разведка маълумотларини йиғишни ўз зиммасига олишни талаб қилгани ҳақида хабар берилганди.