Лукашенко “Тинчлик кенгаши”га қўшилиш ҳақидаги ҳужжатни имзолади

Беларусь резиденти Александр Лукашенко мамлакатнинг Ғазо бўйича “Тинчлик кенгаши”га қўшилиши ҳақидаги ҳужжатни имзолади. Бу ҳақда у кеча, 20 январь куни маҳаллий телеканалга берган интаевьюсида маълум қилди.

“Мен ҳозиргина ҳужжатни имзоладим. Мен улар сўраганидек, Қўшма Штатларга тегишли мурожаатни имзоладим, унда биз уларнинг ушбу Кенгашнинг асосчи аъзоси бўлиш таклифини қабул қилишга тайёр эканлигимиз билдирилган”, дейди Лукашенко.

У Беларуснинг “Тинчлик кенгаши”да иштирок этиш истиқболлари ҳақида гапирар экан, мамлакат салоҳиятини ҳушёрлик билан баҳолаётганини, айниқса, Ғазо сектори билан боғлиқ гуманитар масалаларда мумкин бўлган ёрдам кўлами ҳақида ҳеч қандай тасаввурга эга эмаслигини маълум қилган. 

У Беларусь Украинадаги вазиятни ўз ичига олган тинчлик ташаббуслари ва мулоқотни илгари суриш бўйича Кенгаш ишида фаол иштирок этишни кутаётганини ҳам таъкидлаган. Шунингдек, “Тинчлик кенгаши”нинг ваколати ва таъсирини бошқа минтақаларга, биринчи навбатда Украина можароси шароитида кенгайтириш имкониятига кўпроқ қизиқиш билдираётганини айтган. Унинг фикрича, Беларусь тинчлик ташаббусларини муҳокама қилишга кўмаклашуви  Украина раҳбариятига таъсир кўрсатиши мумкин.

“Тинчлик кенгаши”га қўшилишнинг ҳақиқий шартлари ва 1 миллиард АҚШ долларилик ҳисса зарурлиги ҳақидаги миш-мишлар ҳақидаги саволга жавобан резидент бу даъволар ҳақиқатга тўғри келмаслигини билдирган.

“Бу касал одамлар яна бир бор ўзларини аҳмоқ қилишди. Сиз шунчаки ҳужжатни ўқиб чиқишингиз керак. Ҳеч қандай пул талаб қилинмайди”, дейди у.

Лукашенко дастлабки 3 йил давомида ушбу ташкилотда ихтиёрий равишда асосчи сифатида иштирок этиш мумкинлигини тушунтирган. Унинг айтишича, 1 миллиард АҚШ долларилик бадал талаби фақат ушбу даврдан кейин давлат сайлов жараёнларида, таклифномаларда ёки тайинлашларда қатнашмасдан ўз фаолиятини давом эттиришни кутган тақдирдагина юзага келади. 

“Демак, буларнинг барчаси ёлғон. Айтишларича, менинг рейтингимни, ролимни ва ҳоказоларни пасайтириш. Албатта, бу мен учун муҳим. Лекин бу мен ўйлайдиган охирги нарса. Агар 1 миллиард АҚШ доллари тўлаш керак бўлса, мен уни тўлардим”, дейди Лукашенко.

Шунингдек, у бу миқдор фақат уч йилдан кейин иш формати сақланиб қолиши керак бўлган тақдирдагина зарурлигини таъкидлаган. Шу билан бирга, Лукашенко муқобил шарт мавжудлигини айтиб ўтган. Унга кўра, тинчлик учун фаол ва виждонан ҳамкорлик билан бадал тўламасдан иштирок этишни давом эттириш мумкин ва айнан шу вариантни кўзлаётганини қўшимча қилган.

Эслатиб ўтамиз, аввалроқ АҚШ Президенти Дональд Трамп 22 январь куни Давосда бўлиб ўтадиган Жаҳон иқтисодий форуми доирасида Ғазо секторини тартибга солиш бўйича “Тинчлик кенгаши” ваколатлари ва низомининг тўлиқ матнини тасдиқлашни режалаштираётгани ҳақида хабар берилган эди. 

Шунингдек, Дональд Трамп бугунгача ушбу Кенгашга Россия, Туркия, Ҳиндистон, Миср, Қозоғистон ва Ўзбекистон Президентларини таклиф қилгани ва ушбу кенгашда олтмишга яқин мамлакат иштирок этиши кутилаётгани ҳақида хабар берилганди.