Музокаралар якунланмасдан Россия Киев ва Харьковга ҳужум қилди (видео)

Бирлашган Араб Амирликларининг Абу-Даби шаҳрида Украинадаги урушни тугатиш бўйича уч томонлама музокаралар давом этаётган бир паллада, бугун, 24 январга ўтар кечаси Россия Украинага яна бир йирик ракета ва дрон ҳужумини уюштирди. Ҳужумнинг асосий нишони Киев бўлиб, у ерда муҳим инфратузилма объектларига зарба берилди. Бу ҳақда “Главред” хабар берди.

Қайд этилишича, дрон парчаларининг қулаши оқибатида Киевнинг бешта тумани зарарланган. Камида бир киши ҳалок бўлган, тўрт киши жароҳат олган, баъзи жойларда ёнғин чиққан, аммо жиддий зарарлар ҳақида хабар берилмаган.

Харьковда ҳам деярли икки ярим соат давомида дрон ҳужуми кузатилган. Шаҳарда камида 25 та дрон учирилган. Нишонга кўп қаватли бинолар, хусусий уйлар, маҳаллий шифохона, туғуруқхона ва ички кўчирилганлар яшайдиган ётоқхона олинган. Ҳужумларда 14 киши, жумладан, ҳомиладор аёл ва бола жароҳат олган.

Маълумотларга кўра, фақат январь ойида Россия Украинага камида учта йирик ҳужум уюштирган, оқибатда турар-жой бинолари, электр энергияси ва сув таъминотида кенг кўламли муаммолар юзага келган. Россия Мудофаа вазирлиги ҳужумларни тан олади, аммо уларнинг мақсади Украина ҳарбий-саноат комплексини бузиш эканлигини иддао қилмоқда.

Эслатиб ўтамиз, аввалроқ Украина, Россия ва АҚШ ўртасидаги музокараларнинг биринчи босқичи якунлангани ҳақида хабар берилганди.