Нобель қўмитаси маълумотлар сизиб чиқиши юзасидан тергов бошлади

Нобель қўмитаси Тинчлик бўйича мукофот совриндори Мария Корина Мачадога тикилган ставкалар кескин ошганидан сўнг, маълумот сизиб чиқиши эҳтимолини текширади. Бу ҳақда Нобель институти директори Кристиан Берг Харпвикен Норвегиянинг “Aftenposten” газетасига маълум қилган.

Нашрнинг ёзишича, кеча, 10 октябрга ўтар кечаси, яъни ғолиб эълон қилинишидан олдин қимор платформаларидан бири – Polymarket сайтида Венесуэла мухолифати етакчисига бўлган ставкалар кескин ошган.

Икки соат ичида Мачадога Нобель тинчлик мукофоти берилиш эҳтимоли 3,75 фоиздан 72,8 фоизгача кўтарилган. Венесуэлалик сиёсатчи фойдасига бир неча йирик гаровлар қўйилган бўлиб, улардан бири 67 минг доллардан ошган.

Нобель институти раҳбари қўмита бу ҳолатни тергов қилиши ва эҳтимол “рақамли маълумот сизиб чиқиши” билан боғлиқ бўлиши мумкинлигини таъкидлаган.

Эслатиб ўтамиз, 2025 йилги Нобель тинчлик мукофоти Венесуэла мухолифат сиёсатчиси Мария Корина Мачадога “Венесуэлада демократияни тарғиб қилишдаги саъй-ҳаракатлари учун” топширилгани эълон қилинди. Қайд этиш жоиз, АҚШ Президенти Дональд Трамп ҳам бу мукофотни олишни жуда истаган эди. Натижалар эълон қилингач, Оқ уй бу борада алоҳида баёнот билан чиқди. Кейинроқ, Мария Корина Мачадо Дональд Трамп билан суҳбатлашиб, мукофотни унинг шарафига бағишлаганини маълум қилди.