PKK Туркияни тарк этмоқда 

Туркияда тақиқланган Курдистон Ишчилар партияси (PKK) республика ҳудудидан ўз қуролли тузилмаларини олиб чиқишни бошлаганини маълум қилди. Бу ҳақда партиянинг ўзи хабар берган ва Туркиянинг ҳукмрон Адолат ва тараққиёт партияси расмий вакили Ўмер Челик бу маълумотни тасдиқлаган. 

Ўмер Челикнинг сўзларига кўра, PKK’нинг бу қадами ва қуролсизланиш жараёнидаги янги чоралар Туркияни терроризмдан холи қилиш йўлида эришилган тараққиётдан далолат беради. Унинг таъкидлашича, Туркия ҳудудидаги PKK унсурларини йўқ қилиш, шунингдек, унинг минтақадаги, хусусан Ироқ ва Суриядаги қуролли ҳамда ноқонуний тузилмаларини тугатиш ва кейинчалик тўлиқ қуролсизлантириш – Туркияни терроризм таҳдидидан халос қилишнинг асосий шартларидан биридир.

PKK баёнотига кўра, бу қарор партия етакчиси бўлмиш ҳозирда Туркияда умрбод қамоқ жазосини ўтаётган Абдулла Ўжалоннинг розилиги билан қабул қилинган. Баёнот Ироқдаги Кандил ҳудудида жангариларнинг базасида ўқиб эшиттирилган. Уларнинг фикрича, Туркия ҳудудида қуролли гуруҳларнинг қолиши турли провокациялар ва тўқнашувларга сабаб бўлиши мумкин. 

Маълумот учун, Курдистон Ишчилар партияси 1978 йил 27 ноябрда чап социалистик партия сифатида ташкил этилган ва 1984 йил 15 августдан бошлаб Туркия ҳукуматига қарши қуролли урушни бошлаган. Унинг тарафдорлари Абдулла Ўжалонни олий етакчи ва мафкуравий илҳомлантирувчи деб билади.

Туркия, АҚШ, Европа Иттифоқи ва айрим бошқа давлатлар PKKʼни террорчи ташкилот деб тан олган.

Абдулла Ўжалон 1999 йилдан бери Имрали оролидаги қамоқхонада изоляцияда сақлаб келинмоқда. У жорий йилнинг 27 февраль куни тарихий баёнот бериб, тарафдорларини Туркияга қарши 40 йилдан ортиқ давом этган курашдан сўнг қуролларини ташлаб, PKK тарқатилганини эълон қилишга чақирди. Бу ҳаракат 40 мингдан ортиқ одамнинг ўлимига сабаб бўлган можарода тинчликка йўл очишга қаратилган эди.

Эслатиб ўтамиз, аввалроқ Курдистон Ишчилар партияси қуролли можарони тўхтатиш ва ўзини тарқатиб юборишга қарор қилгани ҳақида баёнот тарқатганди. Қолаверса, партия Шимолий Ироқда ўтказилган маросимда ўз ихтиёри билан қуролларини топширгани ва уларни рамзий тарзда ёққанини тасдиқлаганди.