Путин аллақачон Учинчи жаҳон урушини бошлаган – Зеленский

Россия Президенти Владимир Путин, аллақачон Учинчи жаҳон урушини бошлаган. Бу фикрни Украина Президенти Владимир Зеленский BBC журналисти Жереми Боуэнга берган интервьюсида айтди.

Зеленскийнинг сўзларига кўра, масала Путин қай даражада ҳудудларни эгаллай олишида ва уни қандай тўхтатишдадир. Унинг таъкидлашича, Россия “ўз дунёсини олиб келиш ва одамларга ёқадиган ҳаёт тарзини ўзгартиришни” истайди.

Зеленский яна бир бор Украина Россия талаб қилаётган ҳудудий ён беришларга бормаслигини айтган. Унинг фикрича, гап фақат ер масаласида эмас, балки у ерда яшаётган юз минглаб одамлар тақдири ҳақида кетмоқда. Бундай қарор жамиятни бўлиб юбориши мумкин.

Президентнинг айтишича, ҳатто Россия талаблари бажарилса ҳам Путин тўхтамайди. Унга тикланиш учун танаффус керак, кейин эса у “давом эттиришни хоҳлайди”. Зеленскийга кўра, тикланиш учун Россияга бир неча йил керак бўлиши мумкин, Европа ҳамкорлари эса бу муддатни уч-беш йил деб баҳоламоқда.

Зеленский Украина ютқазмаётганини, чунки мамлакат мустақиллик учун курашаётганини таъкидлаган. Унинг сўзларига кўра, ғалаба – одамлар ўлдирилишининг тўхташи ва одатий ҳаётга қайтишдир. Кенг маънода эса, Путиндан келаётган глобал таҳдидни бартараф этишдир.

Шунингдек, Зеленский Украина ўз ҳудудларини қайтариб олишини, бу фақат вақт масаласи эканини айтган. Бироқ, ҳозир бундай ҳаракат миллионлаб одамлар ҳаёти эвазига тушиши мумкинлигини урғулаган.

У яна Украина хавфсизлик кафолатлари бўлган тақдирда сайлов ўтказишга тайёрлигини билдирган, аммо ўзи яна президентликка номзодини қўйиш-қўймаслигини билмаслигини айтган.

Эслатиб ўтамиз, аввалроқ Владимир Зеленский Женевада Россия делегацияси билан ўтказилган икки кунлик музокаралар натижаларини етарли эмас деб баҳолаган эди.