“Реал” илк мағлубиятдан сўнг Арбелоани ишдан ҳайдаши мумкин

“Реал Мадрид” раҳбарияти жамоанинг биринчи мағлубиятидан сўнг янги бош мураббий Альваро Арбелоани истеъфога чиқаришни кўриб чиқмоқда. Бу ҳақда Cadena SER хабар берди.

“Қироллик клуби”нинг Арбелоа қўл остида дебют ўйини омадсиз бўлиб ўтди. Жамоа Испания Кубогидан 1/16 финал босқичида Сегунданинг “Альбасете” жамоасига ютқазиб, кубокни тарк этди.

Манбага кўра, “Реал Мадрид” раҳбарияти Арбелоанинг тез истеъфога чиқишидан қўрқмайди. Агар раҳбарият унинг тайинланиши хато бўлган деб ҳисобласа, у билан тез орада йўлларини ажратиши мумкин. Шунингдек, клуб Арбелоанинг келажаги бўйича якуний қарор қабул қилинишидан олдин яна битта ўйинни кузатиб чиқмоқчи.

Маълумот учун, 19 турдан сўнг Мадрид клуби Ла Лига турнир жадвалида “Барселона”дан 4 очко кам тўплаган ҳолда иккинчи ўринда бормоқда.

Эслатиб ўтамиз, Арбелоа жорий йилнинг 12 январь куни Хаби Алонсо истеъфога чиққанидан сўнг “Реал Мадрид”ни бошқаришни бошлаган. “Реал Мадрид”нинг кейинги ўйини 17 январь куни Ла Лигада “Леванте”га қарши бўлиб ўтади.