Тошкентдаги боғчалар карантин сабаб ёпилдими?

Ижтимоий тармоқларда Тошкент шаҳридаги айрим мактабгача таълим ташкилотларида карантин жорий этилиши мумкинлиги ҳақида турли хабарлар тарқалди. Ҳолат юзасидан Санепидқўмита Тошкент шаҳар бошқармаси баёнот берди. 

Маълум қилинишича, ҳозирги кунда Тошкент шаҳрида карантин эълон қилинишига сабаб бўладиган хавфли юқумли касалликлар бўйича эпидемиологик вазият барқарор.

Ижтимоий тармоқларда айтилаётган турли касалликлар (қизамиқ, менингит, гепатит, сил ва бошқалар) бўйича карантин эълон қилиниши заруратини келтириб чиқарадиган ҳолатлар мавжуд эмас.

“Шуни таъкидлаш лозимки, ҳар йили қишки мавсумда грипп ва ЎРВИ билан касалланиш ҳолатлари аҳолида мавсумий равишда кўпаяди. Шу сабабли таълим ташкилотларида болалар саломатлигини ҳимоя қилиш мақсадида эрталабки фильтр (саралаш) ишлари, тана ҳароратини ўлчаш, касаллик белгилари бор болаларни вақтинча ажратиш, ота-оналарга тавсиялар бериш каби профилактик чоралар олиб борилади. Айни шу фильтр жараёнлари айрим фуқаролар томонидан карантин сифатида нотўғри талқин қилинган”, дейилади хабарда. 

Эслатиб ўтамиз, аввалроқ Нипаҳ вируси сабабли Ўзбекистонга Ҳиндистондан ҳайвонлар ва қушларни олиб келиш тақиқланганди.