Трамп Эронга режалаштирилган зарбаларни бекор қилди

АҚШ Президенти Дональд Трамп кеча, 11 июнь куни кечқурун Эрон ҳудудига режалаштирилган ҳарбий зарбалар амалга оширилмаслигини маълум қилди. Бу ҳақда у Truth Social тармоғида ёзиб қолдирди.

Унинг сўзларига кўра, Эрон билан олиб борилган музокаралар Ислом Республикаси раҳбариятининг энг юқори даражасига етказилган ва улар томонидан маъқулланган. Шу сабабли, у режалаштирилган бомбардимонларни бекор қилган.

Трамп музокараларда иштирок этган барча томонлар – жумладан Исроил, Саудия Арабистони, БАА, Қатар, Туркия, Покистон, Баҳрайн, Қувайт, Иордания ва Миср ҳам келишувни қўллаб-қувватлаганини билдирган.

Унинг айтишича, денгиз блокадаси келишув тўлиқ имзоланмагунча сақланиб қолади, келишув қачон ва қаерда имзоланиши кейинроқ эълон қилинади.

“Axios” нашрига кўра, музокараларда асосий келишмовчиликлар Қатар воситачилигида ҳал қилинган.

Аввалроқ, АҚШ Эроннинг жанубидаги ҳарбий объектларга зарба бергани, бу эса икки томон ўртасидаги кескинликни кучайтиргани хабар қилинган эди. Кейинчалик Эрон Ҳормуз бўғозини ёпгани ва АҚШ ҳамда Эрон ўртасида айбловлар давом этаётгани айтилган.

Ҳозирги қарор эса, вазиятни вақтинча юмшатишга қаратилган қадам сифатида баҳоланмоқда.

Эслатиб ўтамиз, аввалроқ Дональд Трамп ҳозирги кундаги Эронга қарши қилинган ҳужумларга Исроилнинг алоқаси йўқлигини айтганди.