Трамп Хоманаийнинг таҳдидига жавоб қайтарди (видео)

АҚШ Президенти Дональд Трамп Эрон Олий раҳбари Оятуллоҳ Али Хоманаийнинг “Агар АҚШ Эронга ҳужум қилса, уруш минтақавий тус олади”, деган баёнотига жавоб берди. Трампнинг бу ҳақдаги фикрларини Оқ уй матбуот хизмати келтирди.

Трампнинг айтишича, АҚШ Эрон томони йўналишида дунёдаги энг катта ва энг кучли ҳарбий кемаларга эга. Шу билан бирга, у можаронинг ҳарбий йўл билан ҳал қилинишидан кўра, ядровий келишувга эришилишини умид қилаётганини айтган. 

“Умид қиламанки, биз келишув тузамиз. Агар келишув бўлмаса, унда Хоманаий ҳақ бўлганми-йўқми, билиб оламиз”, деган. 

Али Хоманаий ўз баёнотида Эрон ҳужумкор сиёсат юритишни истамаслигини, бироқ мамлакат хавфсизлигига таҳдид бўладиган ҳар қандай ҳаракатга кескин жавоб беришга тайёр эканини таъкидлаган эди.

Шунингдек, Хоманаий Эронда яқинда юз берган тартибсизликлар, талон-торож ва ҳужумлар мамлакатни беқарорлаштиришга қаратилган уриниш бўлганини айтган. Унинг сўзларига кўра, бу ҳаракатлар давлат бошқарув тизимини издан чиқаришга қаратилган, аммо ҳукумат уларни бостиришга муваффақ бўлган.

Вазият кескинлашуви Трампнинг Эрон томонга USS Abraham Lincoln бошчилигидаги авиация ташувчи кемалар гуруҳи юборилгани ҳақидаги баёнотлари фонида юз берган. Трамп, агар ядровий келишув бўйича олдинга силжиш бўлмаса, куч ишлатилиши мумкинлигини ҳам истисно қилмаган.

Шундан сўнг Теҳронда АҚШ билан музокараларни ташкил этишда маълум даражада силжиш борлиги ҳақида хабар берилган. Трамп эса келишувга эришиш мумкинлигига яна бир бор умид билдирган.

Эслатиб ўтамиз, аввалроқ Эрон Ҳормуз бўғозида икки кунлик ҳарбий машғулотлар бошланишини эълон қилганди. Бу машғулотлар минтақада ҳаракатланаётган АҚШ техникалари яқинида ўтказилиши режалаштирилган. АҚШ Қуролли кучларининг Яқин Шарқдаги Марказий қўмондонлиги Эрон ҳарбийларига огоҳлантириш билан чиққан. Унда АҚШ томони америкалик ҳарбий кемалар устидан хавфли парвозлар ёки Эрон катерларининг тўқнашув йўналишида яқинлашуви каби манёврларга йўл қўйилмаслигини таъкидлаган.