Ўзбекистон март ойида кимлар билан майдонга тушиши маълум бўлди

Ўзбекистон миллий терма жамоаси жорий йилнинг март ойидаги халқаро танаффус пайти “FIFA Series” доирасида Габон, Исландия ва Тринидад ва Тобаго терма жамоаларининг 2 тасига қарши учрашув ўтказиши мумкин. Бу ҳақда “Asean Football” портали хабар берди.

Манбага кўра, Ўзбекистонда мезбонлик қилинадиган турнир иштирокчилари аллақачон аниқланган. Фабио Каннаваро шогирдлари ушбу мусобақа доирасида Габон, Исландия ва Тринидад ва Тобаго терма жамоаларининг 2 тасига қарши учрашув ўтказади. 

2026 йилги “FIFA Series” мусобақаси дунёнинг бир нечта минтақаларини қамраб олган. Бу турнирга мезбон сифатида Ўзбекистондан ташқари Австралия, Озарбайжон, Индонезия, Қозоғистон, Маврикий, Пуэрто-Рико ва Руанда давлатлари ҳам  танлаб олинган.

FIFA 2026 серияси халқаро мусобақаларда янги формат бўлиб, турли конфедерациялардан келган миллий жамоаларга расмий саралаш ва қитъа турнирларидан ташқари бир-бирига қарши ўйнаш имконини беради.

Жамоалар дунёнинг турли минтақаларини ифодаловчи тўрт кишилик гуруҳларга бўлинади. Ҳар бир гуруҳдаги ҳар бир жамоа иккита ўртоқлик ўйини ўтказади.