Ўзбекистонлик таэквондочилар Жаҳон чемпионати совриндори бўлди

Хитойнинг Уси шаҳрида ўтаётган таэквондо WT бўйича Жаҳон чемпионатида Ўзбекистон терма жамоаси аъзолари Жаҳонгир Худойбердиев ва Светлана Осипова совриндорлар қаторидан жой олди.

Мусобақанинг кеча, 26 октябрь куни бўлиб ўтган баҳсларида -54 кг вазн тоифасидаги баҳсларда қатнашган Жаҳонгир Худойбердиев турнир ярим финалига етиб борган. Финал йўлида Корея Республикаси вакили Сё Ёнсу билан баҳсда имкониятни бой бериб, Жаҳон чемпионатининг бронза медали билан тақдирланган.

Бугунги, 27 октябрь кунги баҳсларда иштирок этган Светлана Осипова +73 кг вазн тоифаси финалига қадар етиб борган ва финалда туркиялик Нафия Кусга имкониятни бой бериб, кумуш медални қўлга киритган. Бу Осипованинг Жаҳон чемпионатларидаги учинчи медали ҳисобланади. Бунгача унинг ҳисобида дунё биринчиликларининг 1 тадан олтин ва кумуш медаллари бор эди. 

Эслатиб ўтамиз, Светлана Осипова Париж ёзги Олимпиада ўйинларида +67 кг вазн тоифасидаги финал беллашувида франциялик Альтея Лоренга қарши имкониятни бой бериб, Олимпиаданинг кумуш медалини қўлга киритган эди.