“Венесуэланинг муваққат президенти”. Трамп ҳазиломуз фотони эълон қилди

Кеча, 11 январь куни АҚШ етакчиси Дональд Трамп Truth Social ижтимоий тармоғига ўзининг расмий портрети ва унинг лавозими ёзиладиган пастки қисмига “Венесуэланинг муваққат президенти” деган ёзув туширилган постни ҳазил тариқасида жойлаган. Трамп, шунингдек, ушбу лавозимга 2026 йилнинг январь ойидан бошлаб киришганини ҳам қайд этган.  

Бундан ташқари, Трамп постда АҚШнинг 45- ва 47-Президенти эканини ва бу лавозимни у 2025 йил 20 январда эгаллаганини ҳам қайд этган. 

Маълумки, йил бошида АҚШ Венесуэлага қарши “кенг кўламли” ҳарбий операцияни амалга оширган ва унда мамлакат раҳбари Николас Мадуро қўлга олинганди. У рафиқаси Силия Флорес билан бирга Нью-Йоркка олиб борилган ва уларга “наркотерроризм” бўйича айблов қўйилган.  

Трампнинг айтишича, АҚШ Венесуэлани хавфсиз, тўғри ва оқилона ўтиш даври амалга оширилмагунча бошқаради. 

“Венесуэлада венесуэлаликлар манфаатини кўзламайдиган бошқа бир шахс ҳокимиятни эгаллаб олишига йўл қўя олмаймиз”, деган Оқ уй раҳбари. 

Маълумот учун, ўтган ҳафта Венесуэла вице-президенти ва нефть вазири Делси Родригес мамлакатнинг муваққат президенти сифатида расман қасамёд қилган эди.  

Эслатиб ўтамиз, аввалроқ Делси Родригес бошчилигидаги Венесуэла муваққат ҳукумати АҚШ билан дипломатик алоқаларни кенгайтириш имкониятларини ўрганишни бошлагани ва шу доирада АҚШ Давлат департаменти вакиллари техник ҳамда логистик баҳолаш ишларини олиб бориш учун Каракасга ташриф буюргани хабар берилганди.