Вучич Европа Россия билан урушга тайёрланаётганини айтди

Европадаги барча давлатлар Россия билан эҳтимолий урушга тайёрланмоқда. Бу ҳақда кеча, 11 ноябрь куни Сербия Президенти Александр Вучич “Pink” телеканали эфирида сўз очди.

“Мен фактларни таҳлил қилар эканман, Европа билан Россия ўртасидаги уруш тобора аниқ бўлиб бормоқда, деган хулосага келдим. Бу шунчаки сўз эмас. Ҳамманинг унга тайёргарлик кўраётгани аён”, дейди Вучич.

У бу сўзларни Франция Қуролли кучлари Бош штаби раҳбари генерал Фабьен Мандоннинг “француз армияси уч-тўрт йил ичида Россия билан тўқнашувга тайёр бўлиши керак”, деган баёнотига изоҳ берар экан айтган. Вучич Мандонни “ниҳоятда масъулиятли генерал”, деб атаган. 

“Биз армияни кучайтиришда давом этишимиз керак. Қуролланаётган бўлсак ҳам буни ақл билан қилаяпмиз. Юртимизни ҳимоя қилиш учун катта маблағ сарфлашни давом эттиришимиз зарур”, дейди у.

Бунгача ҳам Сербия Президенти Ғарб мамлакатларининг Россия билан қуролли тўқнашувга тайёрланаётгани ҳақида огоҳлантирган. Шу билан бирга, у ҳеч ким Москвага “ерда” қарши уруш олиб боришга тайёр эмаслигини, бироқ барчаси буни масофадан амалга оширишни режалаштираётганини таъкидлаган. Вучичнинг фикрича, Европа сиёсатчилари Москвани душман сифатида кўрмоқда ва шунга мос равишда ҳукуматлар шакллантирмоқда. Унинг сўзларига кўра, Еврокомиссиянинг амалдаги таркиби ҳам худди шундай тарзда тузилган.

Эслатиб ўтамиз, аввалроқ Польша Россия билан мумкин бўлган урушга тайёргарлик кўриш мақсадида мудофаасини кучайтираётгани ҳақида хабар берилган эди. Хусусан, Польша мудофаа бюджетини сўнгги икки йил ичида 2022 йилга нисбатан уч бараварга оширган. Мамлакат ракета ва артиллерия тизимлари каби қурол-аслаҳа харидларини ҳам кўпайтирган.