ЕИ “катта гапириши” учун дадил қадам ташлаши керак – Мелони

Италия Бош вазири Жоржа Мелони Европа Иттифоқи етакчиларининг норасмий учрашувидан олдин Германия канцлери Фридрих Мерц ва Бельгия Бош вазири Барт Де Вевер билан учрашди. Суҳбат давомида расмий агар ЕИ “катта гапириш”ни истаса, халқаро муаммоларга дуч келганда аниқ чоралар кўриши кераклигини таъкидлади. Бу ҳақда ANSA нашри ёзди.

“Ҳаммаси Европа Иттифоқи рақобатбардошлик масалаларига аниқ, самарали ва тезкор жавоблар бера олишига боғлиқ, чунки энди вақтни беҳуда сарфлашнинг ҳожати йўқ”, деди Мелони ташкилотга аъзо 27 та давлатдан 20 таси иштирок этган саммит олдидан журналистларга.

Мелони, шунингдек, Мерц билан яқинда амалга оширган қўшма ташаббуслари Франция Президенти Эммануэль Макронни четга суриб қўйишга уриниш бўлганлиги ҳақидаги хабарларни рад этган.

“Бу масалаларда, албатта, Берлин билан ўзаро стратегиямиз мавжуд. Ҳозирда икки томонлама ҳамкорлик кучаймоқда, аммо бу бошқаларга қарши олиб борилаётган иш эмас. Франция ҳам музокараларда иштирок этмоқда”, деди у.

Эслатиб ўтамиз, аввалроқ Франция Президенти Эммануэль Макрон агар зарур чоралар кўрилмаса, Европа беш йил ичида жиддий инқирозга юз тутиб, йўқолиб кетиши мумкинлиги ҳақида огоҳлантирганди. Етакчи ўз баёнотида Европада айрим муҳим саноат тармоқлари – кимё, автомобилсозлик ва станоксозлик соҳаларида кескин пасайиш кузатилаётганини таъкидлаган. Шунингдек, у бир томондан Хитой билан савдо босими кучайиб, иккинчи томондан АҚШ сиёсатида беқарорлик мавжудлигини қайд этиб, Европа ушбу жараёнларда томошабин бўлиши, ёки фаол иштирок этиши лозимлигини урғулаганди.

Мусулмон Содиқ