Зеленский Макрон билан учрашди

Бугун, 1 декабрь куни Украина Президенти Владимир Зеленский Франция Президенти Эммануэль Макрон билан музокаралар ўтказиш учун Парижга етиб борди. Ташриф АҚШ бошчилигида олиб борилаётган тинчлик музокаралари фонида амалга ошмоқда. Бу ҳақда “Euronews” хабар берди.

Кеча, 30 ноябрь куни Зеленскийнинг Европага сафари олдидан, Флоридада Украина ва АҚШ расмийлари ўртасида учрашув бўлиб ўтди. АҚШ Давлат котиби Марко Рубио мазкур учрашувни “самарали” деб атади. Мулоқотда АҚШнинг таклиф этган тинчлик режаси муҳокама қилингани билдирилди.

Европалик иттифоқчилар, хусусан Франция, режанинг бир қатор бандларини кескин танқид қилиб, айнан улар энг қаттиқ эътироз билдирган томон бўлди. Шунга қарамай, улар АҚШнинг тинчликка эришиш бўйича саъй-ҳаракатларини қўллаб-қувватлашини таъкидламоқда.

Бугун, 1 декабрь куни Зеленский билан учрашув арафасида Макрон девони икки етакчи “адолатли ва мустаҳкам тинчликнинг шартлари”ни муҳокама қилишини маълум қилди.

АҚШ Президенти Дональд Трамп Украина бўйича таклиф қилинган 28 бандлик тинчлик концепциясини “яхши созланиши керак бўлган концепция” деб баҳолади. Мазкур ҳужжат Украина армияси сонига чеклов қўйиш, Киевнинг НАТОга кириш имкониятини чеклаш ва айрим ҳудудлардан воз кечишни талаб қилгани учун танқид остида қолган эди.

Ўтган ҳафта Макрон Киевнинг асосий Европа иттифоқчиларидан бири сифатида, Ғарб давлатларини Украинага ўт очишни тўхтатиш ёки тинчлик келишувига эришиш бўйича қатъий хавфсизлик кафолатлари беришга чақирган эди. У Украина хавфсизлигини таъминлаш учун қуруқлик, денгиз ва ҳаво йўналишларида “кафолат берувчи кучлар” жойлаштирилишини қўллаб-қувватлади.

Бу орада Кремль матбуот котиби Дмитрий Песков Россия Президенти Владимир Путин эртага, 2 декабрь куни АҚШ Президентининг элчиси Стив Уиткофф билан учрашишини тасдиқлади. Уиткоффнинг тинчлик жараёнидаги роли, ўтган ҳафта Путиннинг ташқи сиёсат бўйича маслаҳатчиси орқали Трампнинг Украина бўйича позициясига таъсир ўтказиши мумкинлиги ҳақидаги хабарлардан кейин янада долзарблашди.