Зеленский Россияга “энергетик сулҳ” таклиф қилди

Кеча, 6 апрель куни Украина Президенти Владимир Зеленский АҚШ воситачилиги орқали Россияга бир-бирининг энергетика инфратузилмасига зарба бермаслик бўйича таклиф юборди. Бу ҳақда УНИАН хабар берди.

“Агар Россия бизнинг энергетика тизимимизга зарба беришни тўхтатишга тайёр бўлса, биз ҳам худди шундай жавоб беришга тайёрмиз. Бу таклифимиз америкаликлар орқали Россия томонига етказилган”, деган Украина етакчиси. 

Унинг айтишича, Украина Қуролли кучлари Россиянинг АҚШ ва Исроилнинг Эрон билан уруши сабаб юзага келган нефть бозоридаги инқироздан фойда олиш имкониятларини чеклашга ҳаракат қилмоқда.

“Россия нефть нархларининг кескин ошишидан қанча даромад олса, барчасини урушга сарфлайди. Бу уларнинг устувор йўналиши бўлиб қолмоқда. Шунинг учун уларнинг нефть экспорт қилиш имкониятларини ҳар қандай чеклаш тўғри қарор”, дея қўшимча қилган Зеленский. 

Президентнинг билдиришича, Украина аввал ҳам Россияга Пасха байрами муносабати билан сулҳ тузишни таклиф қилган, аммо улар ушбу таклифни кескин рад этган. Зеленский бу қадамни қоралаб, “Россия учун муқаддас ҳеч нарса йўқ” деган. 

Қайд этиш жоиз, 2026 йилнинг қишида Трамп илтимосига биноан Россия вақтинча Украинанинг энергетика объектларига зарба беришни тўхтатган эди. Ушбу “энергетик сулҳ” 29 январдан 1 февралгача, жами тўрт кун давом этган.

Эслатиб ўтамиз, аввалроқ Владимир Зеленский баёнот бериб, АҚШ, Исроил ва Эрон ўртасидаги можаронинг кескинлашуви фонида Киев Patriot ҳаво ҳужумидан мудофаа тизимлари учун ракеталар етказиб берилиши қисқаришига тайёргарлик кўраётганини айтганди.