ЖЧ-2026 иштирокчилари сони 42 тага етди

Кеча, 18 ноябрь куни Европада Жаҳон чемпионати-2026 саралашининг биринчи босқичи якунига етди. Гуруҳ баҳслари натижаларига кўра, Австрия, Испания, Бельгия, Шотландия ва Швейцария терма жамоалари ҳам Жаҳон чемпионати йўлланмасини қўлга киритди.

Европа минтақасидаги саралаш якунланди. Энди гуруҳларда иккинчи ўринни эгаллаган жамоалар 2026 йил март ойида ўтказиладиган плей-офф босқичида яна 4 та йўлланма учун кураш олиб боради.

Шимолий Америка минтақасида ҳам саралашнинг учинчи босқичи ўз ниҳоясига етди. 3 та гуруҳ ғолиби мундиал йўлланмасига эга бўлди. “Б” гуруҳи сўнгги турида Ямайка майдонида дуранг қайд этган Кюрасао ўз тарихида илк бор Жаҳон чемпионатида иштирок этишга эришди. Натижада Ямайка қитъалараро плей-оффга йўлланадиган бўлди. Шунингдек, Панама ва Гаити ҳам ЖЧ-2026 йўлланмасини қўлга киритди.

Шу тариқа, Жаҳон чемпионатига йўл олган жамоалар сони 42 тага етди. Қолган 6 та йўлланма эса 2026 йил март ойида бўлиб ўтадиган плей-офф баҳслари орқали аниқланади.

Эслатиб ўтамиз, аввалроқ Германия ва Нидерландия терма жамоалари ҳам ўз гуруҳларидаги сўнгги тур ўйинларида йирик ҳисобдаги ғалабаларни қўлга киритиб, Жаҳон чемпионатига йўлланмани қўлга киритган эди.